ਇਸ਼ਕ ਝਮੇਲੇ ! - ਬਿੱਟੂ ਅਰਪਿੰਦਰ ਸਿੰਘ ਸੇਖੋਂ

ਕੱਤੀ ਇੱਕ ਨਾ ਪੂਣੀ ਇਸ਼ਕ ਦੀ ਚਰਖਾ ਲੈਗੇ ਖੇੜੇ,
ਘੜਾ ਘੜੋਲੀ ਖੜਕਣ ਕਿੱਧਰੇ ਮਾਤਮ ਸਾਡੇ ਵਿਹੜੇ !

ਚੂਰੀ ਮੁੱਕਗੀ ਵੰਝਲੀ ਟੁੱਟਗੀ ਕੱਖ ਰਿਹਾ ਨਾ ਪੱਲੇ,
ਕੰਨ ਪੜਵਾਏ ਜੋਗ ਕਮਾਇਆ ਵੇਖ ਸਮੇਂ ਦੇ ਗੇੜੇ !

ਪੰਡ ਪੰਨੂ ਦੀ ਬੰਨ ਕੇ ਲੈ ਗਏ ਇਸ਼ਕ ਮਜ਼ਬ ਦੇ ਵੈਰੀ,
ਵਿੱਚ ਥਲਾਂ ਦੇ ਕਿਸਮਤ ਸੜਗੀ ਕੋਈ ਨਾ ਨੇੜੇ ਤੇੜੇ !

ਕਿਹੇ ਝੱਲੇ ਨੇ ਨਹਿਰ ਪੁੱਟਤੀ ਤਿੱਪ ਨਾਂ ਆਇਆ ਪਾਣੀ !
ਇਸ਼ਕ ਇਬਾਦਤ ਓਹੋ ਜਾਣੈ ਜੋ ਇਹ ਕਿਸਬ ਸਹੇੜੇ !

ਫੁੱਲਾਂ ਨਾਲ ਮੁਹੱਬਤ ਕਰਕੇ ਜੇ ਕੋਈ ਮਾਣੇ ਮਸਤੀ,
ਫੇ ਭਲਾ ਕੋਈ ਬਿੱਟੂ ਸ਼ਾਹ ਕਿੰਓ ਇਸ਼ਕ ਝਮੇਲੇ ਝੇੜੇ !

ਅਪਗ੍ਰੇਡ ਵਾਰਸ਼ !
ਬਿੱਟੂ ਸ਼ਾਹ ਮਝੈਲ
ਪੰਜਾਬੀ ਬੋਲਦੇ ਲਾਕੇ ਆਲ਼ਾ !
ਪੂਰਾ ਨਾਵਾਂ
ਬਿੱਟੂ ਅਰਪਿੰਦਰ ਸਿੰਘ ਸੇਖੋਂ