ਚੁੰਝਾਂ-ਪ੍ਹੌਂਚੇ - ਨਿਰਮਲ ਸਿੰਘ ਕੰਧਾਲਵੀ

07.03.2025

ਵਿਧਾਇਕ ਕੁੰਵਰ ਵਿਜੇ ਪ੍ਰਤਾਪ ਨੇ ਸਾਬਕਾ ਰਾਜ ਸਭਾ ਮੈਂਬਰ ਸ਼ਵੇਤ ਮਲਿਕ ਨੂੰ ਖੁੱਲ੍ਹੀ ਬਹਿਸ ਦੀ ਦਿਤੀ ਚੁਣੌਤੀ- ਇਕ ਖ਼ਬਰ

ਜੇ ਤੂੰ ਚੁੰਘੀਆਂ ਬੂਰੀਆਂ ਤਾਂ ਵਿਚ ਮੈਦਾਨੇ ਆ।

ਅਮਿਤ ਸ਼ਾਹ ਨੇ ਬਿਹਾਰ ਚੋਣ ਰੈਲੀ ‘ਚ ਵਜਾਇਆ ਚੋਣਾਂ ਦਾ ਬਿਗਲ- ਇਕ ਖਬਰ

ਕੰਢੇ ਕੰਢੇ ਹੀਰ ਭਾਲ਼ਦਾ, ਰਾਂਝਾ ਪੱਜ ਮੱਝੀਆਂ ਦਾ ਲਾਵੇ।

ਚੀਨ ਨੇ ਅਮਰੀਕੀ ਵਸਤਾਂ ‘ਤੇ 34 ਫ਼ੀ ਸਦੀ ਟੈਕਸ ਠੋਕਿਆ- ਇਕ ਖ਼ਬਰ

ਪੁੱਠਾ ਪੰਗਾ ਲੈ ਲਿਆ ਜੱਟੀਏ, ਬੋਕ ਦੇ ਸਿੰਙਾਂ ਨੂੰ ਹੱਥ ਲਾ ਕੇ।

ਸ਼੍ਰੋਮਣੀ ਕਮੇਟੀ ਦੇ ਨਵੇਂ ਬਜਟ ਵਿਚ ਗ਼ਰੀਬ ਸਿੱਖਾਂ ਲਈ ਕੋਈ ਸਹੂਲਤ ਨਹੀਂ- ਜਸਟਿਸ ਨਿਰਮਲ ਸਿੰਘ

ਖਾਲੀ ਘੋੜੀ ਹਿਣਕਦੀ, ਉੱਤੇ ਨਹੀਂ ਦੀਂਹਦਾ ਵੀਰ।

ਮੈਂ ਕਿਸਾਨਾਂ ਦੇ ਨਾਲ ਹਾਂ, ਕਿਸਾਨਾਂ ਨੂੰ ਆਪਣੇ ਨਾਲ ਲੈ ਕੇ ਦਿੱਲੀ ਜਾਵਾਂਗਾ- ਭਗਵੰਤ ਮਾਨ

ਭਾਵੇਂ ਮੇਰੀ ਮੱਝ ਵਿਕ ਜਾਏ, ਤੈਨੂੰ ਲੈ ਦਊਂ ਸਲੀਪਰ ਕਾਲ਼ੇ।

ਪਟਿਆਲ਼ਾ ‘ਚ ਬਾਗ਼ੀ ਅਕਾਲੀਆਂ ਦੇ ਇਕੱਠ ਨੇ ਸਿਰਜਿਆ ਨਵਾਂ ਇਤਿਹਾਸ- ਇਕ ਖ਼ਬਰ

ਕੀਹਤੋਂ ਤੈਂ ਬਣਾਈ ਛੱਪਰੀ, ਨਾਮਦੇਵ ਤੋਂ ਗਵਾਂਢਣ ਪੁੱਛਦੀ।

ਸ਼੍ਰੋਮਣੀ ਕਮੇਟੀ ਨੂੰ ਬਾਦਲ ਦਲ ਤੋਂ ਮੁਕਤ ਕਰਵਾਉਣ ਲਈ ਸੰਗਤਾਂ ਇਕਜੁੱਟ ਹੋਣ- ਛੋਟੇਪੁਰ

ਵਾਰਸ ਸ਼ਾਹ ਤਰੱਕਲੇ ਵਲ ਪਿਆ, ਸਿੱਧਾ ਹੋਵੇ ਨਾ ਬਾਝ ਹਠੋਲੀਏ ਜੀ।

ਤਾਮਿਲਨਾਡੂ ਦੇ ਮੁੱਖ ਮੰਤਰੀ ਨੇ ਪ੍ਰਧਾਨ ਮੰਤਰੀ ਮੋਦੀ ਤੋਂ ਮਿਲਣ ਲਈ ਸਮਾਂ ਮੰਗਿਆ- ਇਕ ਖ਼ਬਰ

ਕਿਤੇ ਆ ਮਿਲ ਰਾਂਝਿਆ ਯਾਰਾ, ਦੋ ਗੱਲਾਂ ਕਰੀਏ ਪਿਆਰ ਦੀਆਂ।

ਡੋਨਲਡ ਟਰੰਪ ਵਲੋਂ ਰੂਸ ‘ਤੇ 25 ਫ਼ੀ ਸਦੀ ਟੈਰਿਫ਼ ਲਗਾਉਣ ਦੀ ਧਮਕੀ- ਇਕ ਖ਼ਬਰ

ਬਦੀਆਂ ਨਾ ਕਰ ਵੇ, ਕੈ ਦਿਨ ਦੀ ਜ਼ਿੰਦਗਾਨੀ।

ਸਰਕਾਰ ਨੇ ਧੱਕੇ ਨਾਲ ਵਕਫ਼ ਬਿੱਲ ਪਾਸ ਕੀਤਾ- ਸੋਨੀਆ ਗਾਂਧੀ

ਧਰਤੀ ਖੇੜਿਆਂ ਦੀ, ਵੱਢ ਵੱਢ ਹੀਰ ਨੂੰ ਖਾਂਦੀ।

ਮਹਾਰਾਸ਼ਟਰ ਨਵਨਿਰਮਾਣ ਸੈਨਾ ਨੇ ਬੈਂਕਾਂ ਨੂੰ ਗਾਹਕਾਂ ਨਾਲ ਮਰਾਠੀ ਭਾਸ਼ਾ ‘ਚ ਗੱਲਬਾਤ ਕਰਨ ਲਈ ਕਿਹਾ- ਇਕ ਖ਼ਬਰ

ਪੰਜਾਬ ‘ਚ ਹੈ ਕੋਈ ਅਜਿਹਾ ਕਦਮ ਚੁੱਕਣ ਵਾਲਾ ਸੂਰਮਾ?

ਮਹਿਲਾ ਕਾਂਸਟੇਬਲ ਦੀ ਗੱਡੀ ‘ਚੋਂ ਮਿਲੀ ਹੈਰੋਇਨ, ਨੌਕਰੀ ਤੋਂ ਬਰਖ਼ਾਸਤ- ਇਕ ਖ਼ਬਰ

ਫ਼ਕਰਦੀਨਾ ਕਦ ਉੱਥੇ ਖ਼ੈਰ ਹੋਸੀ, ਜਿੱਥੇ ਵਾੜ ਹੀ ਖੇਤ ਨੂੰ ਖਾਂਵਦੀ ਏ।

ਟਰੰਪ ਦੇ ਟੈਰਿਫ਼ ਲਾਉਣ ‘ਤੇ ਭੜਕੇ ਦੁਨੀਆਂ ਭਰ ਦੇ ਆਗੂ- ਇਕ ਖ਼ਬਰ

ਖੂਹ ਟੋਭੇ ਤੇਰੀ ਚਰਚਾ ਹੁੰਦੀ, ਚਰਚਾ ਨਾ ਕਰਵਾਈਏ।

ਪ੍ਰਧਾਨ ਮੰਤਰੀ ਮੋਦੀ ਨੇ ਤਾਮਿਲਨਾਡੂ ਨੂੰ ਮਾਂ ਬੋਲੀ ‘ਚ ਸਿਖਿਆ ਦੇਣ ਲਈ ਕਿਹਾ- ਇਕ ਖ਼ਬਰ।

ਮੂੰਹ ਮੇਂ ਰਾਮ ਰਾਮ, ਬਗਲ ਮੇਂ ਛੁਰੀ।

ਮਹਾਰਾਸ਼ਟਰ ‘ਚ ਮੰਤਰੀ ਕੋਕਾਟੇ ਨੇ ਕਿਸਾਨਾਂ ਪ੍ਰਤੀ ਕੀਤੀ ਵਿਵਾਦਪੂਰਣ ਟਿੱਪਣੀ ਲਈ ਮੰਗੀ ਮੁਆਫ਼ੀ- ਇਕ ਖ਼ਬਰ

ਚਿੜੀਆਂ ਦੀ ਮੌਤ ਗੰਵਾਰਾਂ ਦਾ ਹਾਸਾ।

============================================================================