ਇਬਾਰਤ ਕਿਸਾਨ ਦੀ - ਸੁਰਿੰਦਰਜੀਤ ਕੌਰ
ਜੰਗ ਦੀ ਭੱਠੀ ਵਿਚ ਤਪਿਆ
ਧਰਤੀ ਲਈ ਜੂਝਦਾ ਸੂਰਾ ਜਵਾਨ ਹਾਂ
ਖੇਤਾਂ ਦੇ ਸਿਆੜਾਂ 'ਚੋਂ ਉੱਘਿਆ ਕਿਸਾਨ ਹਾਂ
ਜੇਠ ਹਾੜ੍ਹ ਦੀਆਂ ਵਗਦੀਆਂ ਲੂਆਂ ਦਾ ਭਖਿਆ, ਜਹਾਨ ਹਾਂ
ਪੋਹ ਦੀਆਂ ਕਕਰੀਲੀਆਂ ਰਾਤਾਂ 'ਚੋਂ ਜੰਮਿਆਂ, ਧੁੰਦ ਦਾ ਗਿਆਨ ਹਾਂ
ਜੋ ਸਕੂਲੇ ਨਹੀਂ ਪੜ੍ਹਿਆ, ਓਸ ਬਾਬੇ ਨਾਨਕ ਦੀ ਸੰਤਾਨ ਹਾਂ
ਤਲੀ ਉੱਤੇ ਚੋਗ ਚੁਗਦੇ
ਓਕਾਬ ਦੀ ਸ਼ਾਨ ਹਾਂ
ਓਕਾਬ ਦੀ ਅੱਖ ਵਿਚ ਫੈਲਿਆ ਅਸਮਾਨ ਹਾਂ
ਖੰਭਾਂ ਵਿਚ ਤੈਰਦੇ ਮੁਕਾਮ ਦੀ ਉਡਾਨ ਹਾਂ
ਬਚਨ ਦਾ ਬਲੀ, ਈਮਾਨ ਤੋਂ ਕੁਰਬਾਨ ਹਾਂ
ਗੋਬਿੰਦ ਦੇ ਮੱਥੇ 'ਚ ਮਘਦੇ
ਏਕੇ ਦੇ ਸੂਰਜ ਦੀ ਚਮਕਾਰ ਹਾਂ
ਸਾਡੀ ਅਣਖ ਨੂੰ ਜੇ ਵੰਗਾਰੇ ਕੋਈ
ਤਾਂ ਜਾਗਦੀ ਜਿਉਂਦੀ ਲਲਕਾਰ ਹਾਂ
ਜ਼ੁਲਮ ਵਿਰੁੱਧ ਜੋ ਚਮਕਦੀ
ਓਸ ਲਿਸ਼ਕਦੀ ਤਲਵਾਰ ਦੀ ਧਾਰ ਹਾਂ
ਜਾਂ ਸਹਿੰਦੀ ਜਾਂ ਫਿਰ ਕਰਦੀ ਵਾਰ ਹਾਂ ।
ਟੋਰਾਂਟੋ, ਕੈਨੇਡਾ
