ਚੇਤ ਲੰਘ ਵਿਸਾਖੀ ਦਾ ਮੇਲਾ ਆ ਗਿਆ।
ਮਾਰਦਾ ਹੈ ਕੱਛਾਂ ਜੱਟ ਮੇਲੇ ਆ ਗਿਆ॥

ਨਵਾਬ ਸ਼ਾਹਾਂ ਵਾਲੀ ਤਿਆਰੀ ਕਰਕੇ,
ਸੰਮਾਂ ਵਾਲੀ ਡਾਂਗ ਮੋਢੇ ਉੱਤੇ ਧਰ ਕੇ।
ਚਾੜ ਮੁੱਛਾਂ ਪੱਗ ਤੁਰਲੇਦਾਰ ਬੰਨ੍ਹ ਕੇ,
ਤਿੱਲੇਦਾਰ ਜੁੱਤੀ ਪੈਰੀਂ ਚਾੜ ਕੇ॥
ਟੌਹਰ ਕੱਢ ਜੱਟ ਮੇਲੇ ਆ ਗਿਆ,
ਚੇਤ ਲੰਘ ਵਿਸਾਖੀ...

ਮੇਲੇ ਵਿੱਚ ਰੌਣਕਾਂ ਖੂਬ ਲੱਗੀਆਂ,
ਚੋਬਰਾਂ ਨੂੰ ਦੇਖ ਸ਼ਰਮਾਉਣ ਨੱਢੀਆਂ।
ਚਾਰੇ ਪਾਸੇ ਮੇਲੇ 'ਚ ਬਹਾਰਾਂ ਛਾਈਆਂ,
ਬੰਨ੍ਹ ਬੰਨ੍ਹ ਟੋਲੀਆਂ ਯਾਰਾਂ ਦੀਆਂ ਆਈਆਂ॥
ਕੋਈ ਫਿਰੇ ਝਾਂਜਰਾਂ 'ਚੋਂ ਸੁਰ ਲੱਭਦਾ,
ਆ ਗਿਆ ਨਜਾਰਾ ਅਨੰਦ ਛਾ ਗਿਆ।
ਚੇਤ ਲੰਘ ਵਿਸਾਖੀ...

ਮੇਲੇ ਵਿੱਚ ਹੋਣ ਘੋਲ ਤੇ ਕਬੱਡੀਆਂ,
ਕਿਧਰੇ ਗਏ ਰਾਗ ਸਾਰੰਗੀ ਢਾਡੀਆਂ।
ਮੇਲੇ ਵਿੱਚ ਫਿਰੇ ਕੋਈ ਹੀਰ ਲੱਭਦਾ,
ਹੁਸਨਾਂ ਦੇ ਨਾਲ ਜਾਵੇ ਮੇਲੇ ਮਘਦਾ॥
ਮੇਲੇ 'ਚ ਜਲੇਬੀਆਂ ਲਾਈਆਂ ਤੇਲੀਆਂ,
ਇਕੱਠੇ ਹੋ ਕੇ ਖਾਧੀਆਂ ਯਾਰਾਂ ਬੇਲੀਆਂ।
ਕੋਈ ਜਲੇਬੀ ਨਾਲ ਪਕੌੜਾ ਖਾ ਗਿਆ,
ਚੇਤ ਲੰਘ ਵਿਸਾਖੀ...

ਭੰਗੜੇ ਨੇ ਪੈਂਦੇ ਬੰਨ੍ਹ ਬੰਨ੍ਹ ਟੋਲੀਆਂ,
ਹਿੱਕ ਤਾਣ ਮੁਟਿਆਰਾਂ ਪਾਉਣ ਬੋਲੀਆਂ।
ਹੁਸਨਾਂ ਦਾ ਮੇਲੇ 'ਚ ਗੁਲਾਲ ਵਰ੍ਹਦਾ,
ਹੁਸਨ ਸ਼ਬਾਬ ਚੜ੍ਹਦੇ ਤੋਂ ਚੜ੍ਹਦਾ॥
ਗੱਭਰੂਆਂ ਪੱਗਾਂ ਤੁਰਲੇਦਾਰ ਬੰਨੀਆਂ,
ਸਿਰ ਉੱਤੇ ਮੁਟਿਆਰਾਂ ਲਈਆਂ ਚੁੰਨੀਆਂ।
ਢੋਲ ਵਾਲਾ ਡੱਗੇ ਉੱਤੇ ਡੱਗਾ ਲਾ ਗਿਆ,
ਚੇਤ ਲੰਘ ਵਿਸਾਖੀ...

ਭੋਲੂ ਨੇ ਬਾਬੇ ਦੀ ਉਂਗਲ ਫੜੀ ਹੋਈ ਹੈ,
ਦੂਜੇ ਹੱਥ ਖੇਡ ਤੇ ਖਿਡੌਣਾ ਕੋਈ ਹੈ।
ਭੋਲੂ ਕਰੇ ਜ਼ਿਦ ਕਹਿੰਦਾ ਪਕੌੜੇ ਖਾਣੇ ਆ,
ਸਿਆਣਿਆਂ ਨਾਲ ਟਾਂਵੇ ਟਾਂਵੇ ਨਿਆਣੇ ਆ॥
ਚੰਡੋਲ ਵਾਲਾ ਭਾਈ ਪਿਆ ਵਾਜਾ ਮਾਰਦਾ,
ਲੈ ਲਓ ਨਜਾਰਾ ਕੁਤਬ ਮੀਨਾਰ ਦਾ।
ਵਣਜਾਰੇ ਕੋਲ ਕਈ ਮੁਟਿਆਰਾਂ ਖੜ੍ਹੀਆਂ,
ਖਰੀਦਣ ਉਹ ਵੰਗਾਂ ਲਾਲ ਹਰੀਆਂ॥
ਕਿਸੇ ਨੂੰ ਪਸੰਦ ਨੀਲਾ ਹਰਾ ਆ ਗਿਆ,
ਚੇਤ ਲੰਘ ਵਿਸਾਖੀ...

ਕਿਧਰੇ ਨੇ ਵਿਕਦੇ ਛਿੱਕੂ ਮਧਾਣੀਆਂ,
ਚਾਈਂ ਚਾਈਂ ਖਰੀਦਣ ਸੁਆਣੀਆਂ।
ਕਿਧਰੇ ਵਿਕਦੇ ਮੁਹਾਰ ਟੱਲੀਆਂ,
ਛੇਕੜੇ ਨੂੰ ਕੂੰਜਾਂ ਘਰ ਮੁੜ ਚੱਲੀਆਂ॥
ਜੱਟ ਵੀ ਖ਼ਰੀਦ ਕੇ ਮੁਹਾਰ ਆ ਗਿਆ,
ਚੇਤ ਲੰਘ ਵਿਸਾਖੀ ਦਾ ਮੇਲਾ ਆ ਗਿਆ।
ਮਾਰਦਾ ਹੈ ਕੱਛਾਂ ਜੱਟ ਮੇਲੇ ਆ ਗਿਆ॥


ਹਰਦੇਵ ਇੰਸਾਂ
ਪਿੰਡ ਰਾਮਗੜ੍ਹ ਚੂੰਘਾਂ, ਜਿਲ੍ਹਾ ਸ੍ਰੀ ਮੁਕਤਸਰ ਸਾਹਿਬ।
ਮੋਬਾਈਲ : 94659-55973

9 April 2018

ਪਲ ਪਲ ਰੰਗ ਵਟਾਉਂਦੇ ਲੋਕ।
ਪਿੱਠ ਤੇ ਛੁਰੀ ਚਲਾਉਂਦੇ ਲੋਕ।

ਲਾ ਲਾ ਜੋਤਾਂ ਪੂਜਣ ਬੁੱਤ,
ਮੁਰਦੇ ਕਬਰੋਂ ਉਠਾਉਂਦੇ ਲੋਕ।

ਰੰਗ ਬਿਰੰਗੇ ਕਾਲੇ ਰਾਵਣ,
ਧਰਮੀ ਬਾਣਾ ਪਾਉਂਦੇ ਲੋਕ।

ਅੰਦਰ ਜੰਮੀ ਮਣ ਮਣ ਕਾਲਖ਼,
ਤਨ ਨੂੰ ਸਾਫ਼ ਬਣਾਉਂਦੇ ਲੋਕ।

ਪੈਸੇ ਖਾਤਿਰ ਵੇਚਣ ਜ਼ਮੀਰਾਂ,
ਸੱਚ ਨੂੰ ਝੂਠ ਬਣਾਉਂਦੇ ਲੋਕ।

ਦਰਦਾਂ ਦਾ ਨਾ ਦਰਦ ਪਛਾਨਣ,
ਜਖ਼ਮਾਂ ਤੇ ਲੂਣ ਪਾਉਂਦੇ ਲੋਕ।

ਭੀੜ ਬਣੀ ਤੋਂ ਹੁੰਦੇ ਤਿੱਤਰ,
ਮਤਲਬ ਦੀ ਗੰਢ ਪਾਉਂਦੇ ਲੋਕ।

ਭਰਿਆ ਖੀਸਾ ਦੇਖ ਕੇ ਇੰਸਾਂ,
ਮਿੱਠੀ ਬਾਤ ਸਣਾਉਂਦੇ ਲੋਕ।


ਹਰਦੇਵ ਇੰਸਾਂ
ਰਾਮਗੜ੍ਹ ਚੂੰਘਾਂ, ਸ੍ਰੀ ਮੁਕਤਸਰ ਸਾਹਿਬ।
ਮੋਬਾਈਲ : 94659-55973
29 Jan. 2018

ਘੋਰ ਕਲੂ ਦੇ ਅੰਦਰ ਦੇਖੋ,
ਬੰਦੇ ਬਣੇ ਨੇ ਡੰਗਰ ਦੇਖੋ।

ਮੁੱਲਾ, ਕਾਜੀ ਮਾਰਨ ਠੱਗੀਆਂ,
ਬੈਠੇ ਬਣਕੇ ਕਲੰਦਰ ਦੇਖੋ।

ਪੱਥਰਾਂ ਦੇ ਬੁੱਤ ਪੂਜਣ ਲੋਕੀ,
ਸ਼ਰਧਾ ਵਾਲੇ ਅਡੰਬਰ ਦੇਖੋ।

ਵਿੱਚ ਬਜ਼ਾਰਾਂ ਲੁੱਟਣ ਇੱਜ਼ਤਾਂ,
ਲੁੱਟਦੇ ਹੁਣ ਘਰ ਕੰਜਰ ਦੇਖੋ।

ਗਰੀਬ ਦੇ ਬਾਲ ਵਿਲਕਣ ਭੁੱਖੇ,
ਬੇ-ਅਰਥੇ ਲੱਗਦੇ ਲੰਗਰ ਦੇਖੋ।

ਗਰੀਬਾਂ ਦੇ ਨੇ ਚਿਉਂਦੇ ਢਾਰੇ,
ਸੋਨੇ 'ਚ ਮੜ੍ਹੇ ਮੰਦਰ ਦੇਖੋ।

ਮਾਪੇ ਰੁਲਦੇ ਬਿਰਧ ਆਸ਼ਰਮ,
ਪੁੱਤਾਂ ਦੇ ਦਿਲ ਬੰਜਰ ਦੇਖੋ।

ਇੰਸਾਂ, ਧੀਆਂ ਮਾਰਨ ਮਾਪੇ,
ਕੁੱਖ 'ਚ ਚੱਲਦੇ ਖੰਜਰ ਦੇਖੋ।

ਹਰਦੇਵ ਇੰਸਾਂ
ਰਾਮਗੜ੍ਹ ਚੂੰਘਾਂ, ਸ੍ਰੀ ਮੁਕਤਸਰ ਸਾਹਿਬ।
ਮੋਬਾਈਲ : 94659-55973
29 Jan. 2018

ਮਹਿਕ ਨਾਲ ਭਰਿਆ,
ਖਿੜਿਆ ਗੁਲਾਬ ਹੈ।
ਜੱਗ ਨਾਲੋਂ ਸੋਹਣਾ,
ਰੰਗਲਾ ਪੰਜਾਬ ਹੈ।

ਬਾਜਰੇ ਦੀਆਂ ਰੋਟੀਆਂ,
'ਤੇ ਚਿੱਬੜਾਂ ਦੀ ਚਟਨੀ।
ਸਰੋਂ ਦੇ ਸਾਗ ਉੱਤੇ,
ਲੱਪ-ਲੱਪ ਮਖ਼ਣੀ।
ਚਾਟੀ ਵਾਲੀ ਲੱਸੀ ਦਾ,
ਨਜ਼ਾਰਾ ਲਾਜਵਾਬ ਹੈ।
ਮਹਿਕ ਨਾਲ ਭਰਿਆ,
ਖਿੜਿਆ ਗੁਲਾਬ ਹੈ।

ਛੋਲਿਆਂ ਦੇ ਦਾਣੇ,
ਤੇ ਕਣਕ ਦੀਆਂ ਵੱਲੀਆਂ।
ਅੱਗ ਉੱਤੇ ਭੁੰਨੀਆਂ,
ਮੱਕੀ ਦੀਆਂ ਛੱਲੀਆਂ।
ਚਿੱਥ ਚਿੱਥ ਖਾਣ ਦਾ,
ਬੜਾ ਹੀ ਸਵਾਦ ਹੈ।
ਮਹਿਕ ਨਾਲ ਭਰਿਆ,
ਖਿੜਿਆ ਗੁਲਾਬ ਹੈ।

ਧਾਈਆਂ ਤੇ ਨਿਸਾਰ,
ਖਿੜਨ ਕਪਾਹੀ ਫੁੱਟੀਆਂ।
ਖੜ੍ਹੀਆਂ ਨੇ ਚਰ੍ਹੀਆਂ,
ਦੱਬ ਨਾਲੋਂ ਉੱਚੀਆਂ।
ਖੇਤਾਂ ਵਿੱਚ ਰੌਣਕਾਂ,
ਖਿੜੀ ਬਹਾਰ ਹੈ।
ਮਹਿਕ ਨਾਲ ਭਰਿਆ,
ਖਿੜਿਆ ਗੁਲਾਬ ਹੈ।

ਪੈਂਦੇ ਨੇ ਭੰਗੜੇ,
ਢੋਲ ਦੀ ਤਾਲ ਤੇ।
ਹਿੱਲਦੀ ਹੈ ਧਰਤੀ,
ਗਿੱਧੇ ਦੀ ਧਮਾਲ ਤੇ।
ਹੁਸਨਾਂ ਦੇ ਲੋਅ,
ਗੱਭਰੂ ਯਮਾਲ ਹੈ।
ਮਹਿਕ ਨਾਲ ਭਰਿਆ,
ਖਿੜਿਆ ਗੁਲਾਬ ਹੈ।
ਜੱਗ ਨਾਲੋਂ ਸੋਹਣਾ,
ਰੰਗਲਾ ਪੰਜਾਬ ਹੈ।
ਹਾਂ..ਜੱਗ ਨਾਲੋਂ ਸੋਹਣਾ,
ਰੰਗਲਾ ਪੰਜਾਬ ਹੈ।

ਹਰਦੇਵ ਇੰਸਾਂ
ਪਿੰਡ ਰਾਮਗੜ੍ਹ ਚੂੰਘਾਂ
ਜਿਲ੍ਹਾ ਸ੍ਰੀ ਮੁਕਤਸਰ ਸਾਹਿਬ
ਮੋਬਾਈਲ : 94659-55973

2 Jan 2018