ਜੇ ਤੂੰ ਸਾਹਿਬ ਕਾਂਸ਼ੀ ਰਾਮ ਦੇ ਮਿਸ਼ਨ ਦਾ ਬੰਦਾ
ਜੈ ਭੀਮ ਜੈ ਭਾਰਤ ਕਹਿ ਕੇ ਗੱਡ ਦੇ ਝੰਡਾ
ਦਲ ਬਦਲੂਆਂ ਦੋਗਲਿਆਂ ਦਾ ਮੂੰਹ ਨਾ ਦੇਖੀਂ
ਆਖਰੀ ਦਮ ਤੱਕ ਕਾਇਮ ਰਹੀਂ ਜ਼ਮੀਰ ਨਾ ਵੇਚੀਂ
ਬਹੁਜਨ ਇੱਕ ਅੰਦੋਲਨ ਹੈ ਨੀਤੀ ਦਾ ਫੰਡਾ
ਜੈ ਭੀਮ ਜੈ ਭਾਰਤ..........
ਜਿੱਤਾਂ ਹਾਰਾਂ ਹੁੰਦੀਆਂ ਨੇ ਇਹ ਗੱਲ ਨਾ ਵੱਡੀ
ਕਦੇ ਸਾਥੀਆ ਆਪਣਾ ਧਰਮ ਈਮਾਨ ਨਾ ਛੱਡੀਂ
ਇੱਕ ਦਿਨ ਐਸਾ ਆਊਗਾ ਜਾਊ ਨਿਕਲ ਇਹ ਕੰਡਾ
ਜੈ ਭੀਮ ਜੈ ਭਾਰਤ..........
ਪੁਰਖਿਆਂ ਦਾ ਇਤਿਹਾਸ ਪੜ੍ਹੀਂ ਕੀ ਕਹਿੰਦਾ ਸੱਜਣਾ
ਕਿੱਦਾਂ ਸਾਨੂੰ ਦੱਸਿਆ ਹੈ ਉਹਨਾਂ ਨੇ ਗੱਜਣਾ
ਵੋਟ ਬੈਂਕ ਹੀ ਰਾਜਨੀਤੀ ਦਾ ਅਸਲੀ ਡੰਡਾ
ਜੈ ਭੀਮ ਜੈ ਭਾਰਤ..........
ਨਫ਼ੇ ਅਤੇ ਨੁਕਸਾਨ ਦੇ ਲਈ ਜੋ ਮਿਸ਼ਨ 'ਚ ਵੜਦੇ
ਅਸਲ 'ਚ ਉਹ ਕੁਰਬਾਨੀਆਂ ਦਾ ਇਤਿਹਾਸ ਨਹੀਂ ਪੜ੍ਹਦੇ
"ਚੁੰਬਰਾ" ਨਿੱਗਰ ਸੋਚਾਂ ਨੂੰ ਲੱਗਦਾ ਨਹੀਂ ਹੰਧਾ
ਜੈ ਭੀਮ ਜੈ ਭਾਰਤ..........
ਕੁਲਦੀਪ ਚੁੰਬਰ ਕਨੇਡਾ 604-902-3237

ਕਲਯੁੱਗ ਕਾਲੀ ਬੱਦਲੀ ਅੰਦਰ ਕੀਤੇ ਦੂਰ ਹਨ੍ਹੇਰੇ
ਜਿੱਧਰ ਵੀ ਮੈਂ ਦੇਖਾਂ , ਬਾਬਾ  ਨਾਨਕ ਦਿੱਸੇ ਚੁਫ਼ੇਰੇ 
ਜ਼ੱਰੇ  ਜ਼ੱਰੇ  ਕਣ  ਕਣ ਤੱਕਿਆ , ਹਰ ਪੱਤੇ ਹਰ ਡਾਲੀ 
ਚਹੁੰ ਚੱਕਾਂ ਵਿਚ ਵੱਜਦੀ ਓਸਦੀ ਦੇਖੀ ਧੁੰਨ ਮਤਵਾਲੀ 
ਨੂਰੀ ਮੁੱਖ ਤੇ ਚਾਨਣ ਰਿਸ਼ਮਾਂ , ਡੁੱਲ੍ਹ ਡੁੱਲ੍ਹ ਪੈਣ ਸਵੇਰੇ 
ਜਿੱਧਰ ਵੀ ਮੈਂ ਦੇਖਾਂ  ..........
ਹੱਕ  ਸੱਚ  ਦਾ  ਹੋਕਾ  ਦੇਵੇ ,  ਓਸ  ਦੇ  ਘਰ  ਦੀ  ਬਾਣੀ 
ਧੁਰ ਦਰਗਾਹ ਦੀ ਰਮਜ ਮਾਰਦੀ ਓਸ‍ਦੀ ਅਜਬ ਕਹਾਣੀ 
ਰੱਬ ਨਾਨਕ ਦੇ ਰੂਪ'ਚ ਆਇਆ ਸੱਚਮੁੱਚ ਪਾਉਣ ਲਈ ਫੇਰੇ 
ਜਿੱਧਰ ਵੀ ਮੈਂ ਦੇਖਾਂ  ..........
ਸਿਫ਼ਤਾਂ  ਵਿੱਚ  ਨਾ  ਮਹਿਮਾ  ਆਵੇ , ਵੰਡਦਾ ਜਾਏ ਸੌਗਾਤਾਂ 
ਦਰ ਓਹਦੇ ਤੇ ਸਜਦਾ ਕਰਦੀਆਂ ਅਰਸ਼ ਫਰਸ਼ ਦੀਆਂ ਦਾਤਾਂ 
ਦੀਦ ਓਹਦੀ ਕਰ ਟੁੱਟ ਜਾਂਦੇ ਨੇ, ਜਮ੍ਹਾਂ  ਦੁੱਖਾਂ  ਦੇ  ਘੇਰੇ 
ਜਿੱਧਰ ਵੀ ਮੈਂ ਦੇਖਾਂ  ..........
ਨਿਰੰਕਾਰ ਦੀ  ਜੋਤ ਅਲਾਹੀ , ਚੁੰਬਰਾ ਸੀਸ ਨਿਭਾਈਏ 
ਨਾਨਕ ਨੂਰ ਅਕਾਲ ਪੁਰਖ ਦੇ,  ਤੋਂ  ਬਲਿਹਾਰੇ ਜਾਈਏ 
ਤੂੰ  ਹੀ  ਤੂੰ  ਹੀ  ਰਾਗ  ਅਲਾਪੇ ,  ਨਾ   ਤੇਰੇ   ਨਾ  ਮੇਰੇ 
ਜਿੱਧਰ ਵੀ ਮੈਂ ਦੇਖਾਂ

ਕਾਹਤੋਂ ਫੂੰ ਫੂੰ ਕਰਨੀ ਯਾਰੋ , ਖੁਸ਼ੀ ਨਾਮੇ ਹੀ ਵਕਤ ਗੁਜ਼ਾਰੋ
ਤਾਸ਼ ਦੇ ਪੱਤਿਆਂ ਵਾਂਗ ਇਹ ਭੈੜਾ, ਦਿੰਦਾ ਜੱਗ ਖਿਲਾਰ
ਨਿੱਘੇ ਨਿਘਾਏ ਰਹਿਕੇ ਕੱਟੀਏ, ਜ਼ਿੰਦਗੀ ਦੇ ਦਿਨ ਚਾਰ
ਕਿਹੜੀ ਗੱਲੋਂ ਆਪਣੇ ਸੱਜਣਾ ਜਲਵੇ ਕਰ ਕਰ ਦੱਸਣੇ
ਛੋਛੇਬਾਜ਼ੀਆਂ ਕਰ ਨਾ ਇਥੇ ਹਰ ਇਕ ਨੇ ਤੰਦ ਕੱਸਣੇ
ਸਿਧ ਪੱਧਰਾ ਜੀਵਨ ਅਪਣਾ ਲੈ , ਨਾ ਤੂੰ ਫੁਕਰੀਆਂ ਮਾਰ
ਨਿੱਘੇ ਨਿਘਾਏ ਰਹਿਕੇ ਕੱਟੀਏ ............
ਬੰਦਾ ਛੋਟਾ ਹੋਏ ਜਾਂ ਵੱਡਾ ਸਭ ਦੀਆਂ ਕਰੀਏ ਕਦਰਾਂ
ਬਿਨਾਂ ਗੱਲ ਤੋਂ ਰੱਖ ਨਾ ਐਵੇਂ ਕੁੱਲ ਆਲਮ ਦੀਆਂ ਖ਼ਬਰਾਂ
ਰੁੱਖੀ ਮਿੱਸੀ ਖਾ ਕੇ ਪੀ ਲੈ,  ਪਾਣੀ ਠੰਡਾ ਠਾਰ
ਨਿੱਘੇ ਨਿਘਾਏ ਰਹਿਕੇ ਕੱਟੀਏ .............
ਧੌਂਸਬਾਜੀਆਂ ਕਾਹਦੀਆਂ ਏਥੇ ਰੱਬ ਦੀ ਰਜ਼ਾ 'ਚ ਰਹੀਏ
ਉੱਚਾ ਨੀਵਾਂ ਬੋਲ ਕਦੇ ਨਾ ਕਿਸੇ ਨੂੰ ਭੁੱਲ ਕੇ ਕਹੀਏ
ਇਹ ਜ਼ਿੰਦਗੀ ਦੀ ਬਾਜੀ ਸੱਜਣਾ, ਇੱਕ ਦਿਨ ਜਾਣੀ ਹਾਰ
ਨਿੱਘੇ ਨਿਘਾਏ ਰਹਿਕੇ ਕੱਟੀਏ .............
'ਚੁੰਬਰਾ' ਅੱਖ ਵਿੱਚ ਰੜਕੇ ਜਿਹੜਾ ਓਸਦਾ ਜੱਗ ਹੈ ਵੈਰੀ
ਓਸਦੇ ਹਰ ਇੱਕ ਕੰਮ ਤੇ ਆਲਮ ਰੱਖਦਾ ਹੈ ਅੱਖ ਗਹਿਰੀ
ਇਹ ਰਸਤਾ ਹੈ ਕੰਡਿਆਂ ਭਰਿਆ, ਹੋ ਕੇ ਰਹਿ ਹੁਸ਼ਿਆਰ
ਨਿੱਘੇ ਨਿਘਾਏ ਰਹਿਕੇ ਕੱਟੀਏ .............
          ਪੇਸ਼ਕਸ਼ : ਕੁਲਦੀਪ ਚੁੰਬਰ ਕਨੇਡਾ

ਡੁੱਲ੍ਹੇ ਬੇਰਾਂ ਨੂੰ ਚੁੱਕ ਝੋਲੀ ਪਾ ਸੱਜਣਾ
ਧਰਤੀ ਪਾਣੀ ਹਵਾ ਤੇ ਰੁੱਖ ਬਚਾ ਸੱਜਣਾ

ਹੱਥੋਂ ਲੰਘ ਗਿਆ ਵੇਲਾ ਮੁੜ ਹੱਥ ਆਉਣਾ ਨਹੀਂ
ਗੂੜ੍ਹੀ ਨੀਂਦ ਚੋਂ ਉੱਠ ਜਾਹ ਕਿਸੇ ਜਗਾਉਣਾ ਨਹੀਂ
ਵਾਤਾਵਰਣ ਬਚਾਉਣ ਲਈ ਕਦਮ ਉਠਾ ਸੱਜਣਾ
ਧਰਤੀ ਪਾਣੀ ਹਵਾ ਤੇ ਰੁੱਖ...........

ਬਾਣੀ ਦਾ ਵੀ ਸੱਜਣਾ ਇਹੀਓ ਹੋਕਾ ਏ
ਆਪਣੇ ਆਪ ਦੇ ਨਾਲ  ਕਿਉਂ ਕਰਦਾ ਧੋਖਾ ਏ
ਕਾਬੂ ਆਪਣੀਆਂ ਲੋੜਾਂ ਉੱਤੇ ਪਾ ਸੱਜਣਾ
ਧਰਤੀ ਪਾਣੀ ਹਵਾ ਤੇ ਰੁੱਖ...........

ਕੁਦਰਤ ਦੇ ਸਰੋਤ ਨੇ ਤੋਹਫ਼ੇ ਨਿਆਮਤਾਂ ਦੇ
ਦੇਖੀ ਦਿਨ ਨਾ ਆ ਜਾਣ ਕਹਿਰ ਕਿਆਮਤਾਂ ਦੇ
ਸੁੱਤੀ ਪਈ ਜਮੀਰ ਤੂੰ ਯਾਰ ਜਗਾ ਸੱਜਣਾ
ਧਰਤੀ ਪਾਣੀ ਹਵਾ ਤੇ ਰੁੱਖ...........

ਇਹ ਹਨ ਰੱਬੀ ਦਾਤਾਂ ਕਦਰਾਂ ਕਰ ਲਈਏ
ਆਓ ਇਹਨਾਂ ਦੀ ਰੱਖਿਆ ਲਈ ਦਮ ਭਰ ਲਈਏ
ਰੁੱਖ ਮਨੁੱਖ ਦੀ ਸਾਂਝ ਨੂੰ ਗਲ਼ ਨਾਲ ਲਾ ਸੱਜਣਾ
ਧਰਤੀ ਪਾਣੀ ਹਵਾ ਤੇ ਰੁੱਖ...........

ਧਰਤੀ ਹੇਠੋਂ ਪਾਣੀ ਮੁੱਕ ਜਾਊ ਖ਼ਬਰਾਂ ਨੇ
'ਚੁੰਬਰਾ' ਦੱਸ ਕਿਉਂ ਬੰਨ੍ਹ ਤੋੜੇ ਨੇ ਸਬਰਾਂ ਨੇ
ਕੁਦਰਤ ਸੰਗ ਨਾ ਲੈ ਤੂੰ ਆਹਢਾ ਫਾਹ ਸੱਜਣਾ
ਧਰਤੀ ਪਾਣੀ ਹਵਾ ਤੇ ਰੁੱਖ...........
ਪੇਸ਼ਕਸ਼ - ਕੁਲਦੀਪ ਚੁੰਬਰ ਕਨੇਡਾ

ਸਾਂਭ ਲਓ ਤੁਸੀਂ ਪਾਣੀ ਲੋਕੋ
ਹੋ ਜਾਊ ਖ਼ਤਮ ਕਹਾਣੀ ਲੋਕੋ
ਜਾਗੋ ਆਉਂਦਾ ਜਾਂਦਾ ਕਾਲਾ ਦੌਰ ਖ਼ਰਾਬੀਆਂ ਦਾ
ਬਣਦਾ ਜਾਂਦਾ ਰੇਗਿਸਤਾਨ ਪੰਜਾਬ ਪੰਜਾਬੀਆਂ ਦਾ

ਬਿਨਾਂ ਪਾਣੀ ਦੇ ਦੱਸੋ ਚੱਲੂ ਕਿੰਝ ਜੀਵਨ ਦੀ ਗੱਡੀ
ਹੋਂਦ ਮਨੁੱਖਾ ਤੇਰੀ ਹੈ ਇਸ ਪਾਣੀ ਦੇ ਨਾਲ ਵੱਡੀ
ਦੇਖੀਂ ਖ਼ਤਰੇ ਵਿੱਚ ਨਾ ਪੈ ਜਾਏ ਟੌਹਰ ਨਵਾਬੀਆਂ ਦਾ
ਬਣਦਾ ਜਾਂਦਾ ਰੇਗਿਸਤਾਨ ........

ਪਵਨ ਗੁਰੂ ਤੇ ਪਿਤਾ ਹੈ ਪਾਣੀ ਗੁਰੂਆਂ ਨੇ ਫ਼ਰਮਾਇਆ
ਕਾਦਰ ਦੀ ਕੁਦਰਤ ਨੂੰ ਸਭ ਨੇ ਝੁੱਕਕੇ ਸੀਸ ਨਿਵਾਇਆ
ਬੰਦਿਆ ਕਿਉਂ ਮੁੱਢ ਬੰਨ੍ਹਦਾ ਜਾਂਦਾ ਤੂੰ ਬਰਬਾਦੀਆਂ ਦਾ
ਬਣਦਾ ਜਾਂਦਾ ਰੇਗਿਸਤਾਨ ........

ਇਸ ਦੇ ਵਗਦੇ ਖੂਹਾਂ ਦੇ ਸੀ ਸ਼ਰਬਤ ਵਰਗੇ ਪਾਣੀ
ਬੰਦੇ ਦੀ ਫ਼ਿਤਰਤ ਨੇ ਦਿੱਤੀ ਕੁੱਲ ਵਿਗਾੜ ਕਹਾਣੀ
ਨਹੀਂ ਹਿਸਾਬ ਹੈ ਲੱਗਦਾ ਗ਼ਲਤੀਆਂ ਬੇਹਿਸਾਬੀਆਂ ਦਾ
ਬਣਦਾ ਜਾਂਦਾ ਰੇਗਿਸਤਾਨ ........
'ਚੁੰਬਰਾ' ਬਿਨ ਪਾਣੀ ਦੇ ਜਿਉਣਾ ਹੋ ਜਾਊ ਪਲ ਪਲ ਔਖਾ
ਕੁਦਰਤ ਦੇ ਨਾਲ ਕਰ ਖਿਲਵਾੜ ਨਾ ਜੀਵਨ ਰਹਿੰਦਾ ਸੌਖਾ
ਦੇਖਿਓ ਫਿੱਕਾ ਪੈ ਜਾਏ ਨਾ ਰੰਗ ਫੁੱਲ ਗੁਲਾਬੀਆਂ ਦਾ
ਬਣਦਾ ਜਾਂਦਾ ਰੇਗਿਸਤਾਨ ........

ਆਓ ਇਨ੍ਹਾਂ ਦੀ ਰੱਖਿਆ ਦੇ ਲਈ ਰਲਮਿਲ ਅੱਗੇ ਆਈਏ
ਧਰਤੀ ਹਵਾ ਪਾਣੀ ਤੇ ਰੁੱਖਾਂ ਦੀ ਦਿਲੋਂ ਹੋਂਦ ਬਚਾਈਏ
ਕੁਦਰਤ ਦੇ ਨਾਲ ਮਿਲਕੇ ਮਾਣੀਏ ਰੰਗ ਆਜ਼ਾਦੀਆਂ ਦਾ
ਬਣਦਾ ਜਾਂਦਾ ਰੇਗਿਸਤਾਨ ........
ਪੇਸ਼ਕਸ਼ -  ਕੁਲਦੀਪ ਚੁੰਬਰ ਕਨੇਡਾ

ਕਿੰਨਾ ਧਰਤੀ ਤੇ ਡੁੱਲਿਆ ਬੇਦੋਸ਼ਾਂ ਦਾ ਸੀ ਖੂਨ
ਮਾਰਧਾੜ ਸਾੜ ਫੂਕ ਰਿਹਾ ਤੱਕਦਾ ਕਾਨੂੰਨ
ਚਸ਼ਮਦੀਦ ਹੁਕਮਰਾਨ ਨਾ ਕੋਈ ਗੱਲ ਗੌਲਦਾ
ਚੇਤੇ ਕਰਕੇ ਚੁਰਾਸੀ ਸਾਡਾ ਖੂਨ ਖੌਲਦਾ

ਜਾਨਾਂ ਕੀਮਤੀ ਸੀ ਕਿੰਨੀਆਂ ਜੋ ਮੌਤ ਲਈਆਂ ਲੁੱਟ
ਕਿੰਨਾ ਜਾਲਮਾਂ ਦਾ ਕਹਿਰ ਸੀ ਜੋ ਪਿਆ ਟੁੱਟ ਟੁੱਟ
ਸ਼ੈਤਾਨ ਨਫ਼ਰਤਾਂ ਦੀ ਜ਼ਹਿਰ ਬਸ ਰਿਹਾ ਘੋਲਦਾ
ਚੇਤੇ ਕਰਕੇ ਚੁਰਾਸੀ..........

ਹਾਹਾਕਾਰ ਸੀ ਚੁਫੇਰੇ ਪੈਂਦੇ ਚੀਕ ਤੇ ਚਿਹਾੜੇ
ਬੱਚੇ ਬੁੱਢੇ ਨਰ ਨਾਰੀ ਹੇਠਾਂ ਪੈਰਾਂ ਦੇ ਲਤਾੜੇ
ਚੁੱਪ ਪਸਰੀ ਚੁਫੇਰੇ ਖੂਨੀ ਫਿਰੇ ਟੋਹਲਦਾ
ਚੇਤੇ ਕਰਕੇ ਚੁਰਾਸੀ..........

ਲੱਥ ਪੱਥ ਤਲਵਾਰਾਂ ਖੂਨ ਚੋਵੇ ਲਹਿਰਾਈਆਂ
ਭੁੱਖੇ ਭੇੜੀਏ ਸੀ ਅੱਗਾਂ ਇਨਸਾਨਾਂ ਨੂੰ ਹੀ ਲਾਈਆਂ
ਪਿਆਸੇ ਪਾਣੀਆਂ ਤੋਂ ਖਾਧਾ ਕਿੰਨਕਾ ਨਾ ਚੌਲ ਦਾ
ਚੇਤੇ ਕਰਕੇ ਚੁਰਾਸੀ..........

ਤੂੰ ਤਾਂ ਦਿੱਲੀ ਏ ਨਾ ਹਾਲੇ ਤੱਕ ਦਿੱਤਾ ਇਨਸਾਫ਼
ਤੈਨੂੰ ਸਿੱਖ ਇਤਿਹਾਸ ਕਦੇ ਕਰੇਗਾ ਨਹੀਂ ਮੁਆਫ
'ਚੁੰਬਰ' ਕੱਲਾ ਕੱਲਾ ਪੰਨਾ ਬੈਠ ਕੇ ਫਰੋਲਦਾ
ਚੇਤੇ ਕਰਕੇ ਚੁਰਾਸੀ..........

ਸ਼ਰਧਾਂਜਲੀ ਰਚਨਾ - ਕੁਲਦੀਪ ਚੁੰਬਰ

ਦਸਾਂ ਨੌਹਾਂ ਦੀ ਕਿਰਤ ਕਰਦਿਆਂ ਹੱਕ ਸੱਚ ਦੀ ਖਾਓ
ਬੇਗਮਪੁਰਾ ਵਸਾਓ ਸੰਗਤੇ ਬੇਗਮਪੁਰਾ ਵਸਾਓ

ਨਿਰਭਉ ਨਿਰਭੈ ਹੋਣਾ ਸਿੱਖੋ ਬੇ ਗਮ ਹੋ ਕੇ ਜੀਣਾ
ਕਰੇ ਪ੍ਰੇਰਤ ਬਾਣੀ ਛੱਡ ਦਿਓ ਲਹੂਆਂ ਦਾ ਘੁੱਟ ਪੀਣਾ
ਆਪਣੇ ਅੰਦਰ ਝਾਤੀ ਮਾਰ ਕੇ ਆਪਣਾ ਆਪ ਜਗਾਓ
ਬੇਗਮਪੁਰਾ ਵਸਾਓ ਸੰਗਤੇ ........

ਠੱਗੀ ਠੋਰੀ ਚੋਰੀ ਯਾਰੀ ਛੱਡ ਦਿਓ ਪਾਪ ਕਮਾਉਣੇ
ਨੇਕੀਆਂ ਦੇ ਨਾਲ ਪੱਲੇ ਭਰ ਲਓ ਬੀਤੇ ਦਿਨ ਨਾ ਆਉਣੇ
ਆਪਣਾ ਆਪ ਸੁਧਾਰ ਕੇ ਵਾਤਾਵਰਨ ਸਾਫ਼ ਬਣਾਓ
ਬੇਗਮਪੁਰਾ ਵਸਾਓ ਸੰਗਤੇ ........

ਗੁਰੂਆਂ ਦੇ ਉਪਦੇਸ਼ ਕੀਮਤੀ ਜੀਵਨ ਅੰਦਰ ਢਾਲੋ
ਆਪਣਾ ਦੀਪਕ ਆਪੇ ਬਣ ਕੇ ਜੋਤ ਅੰਦਰਲੀ ਬਾਲੋ
ਦੁੱਖ ਦਰਦਾਂ ਦੀ ਲਾਹ ਕੇ ਬੁੱਕਲ ਸੁੱਖ ਦੇ ਦਰਸ਼ਨ ਪਾਓ
ਬੇਗਮਪੁਰਾ ਵਸਾਓ ਸੰਗਤੇ ........

ਜਨਮ ਨਾ ਮਿਲੇ ਦੁਬਾਰਾ 'ਚੁੰਬਰਾ' ਘਾਲਣਾ ਘਾਲ ਦਿਖਾਵੋ
ਯਾਦ ਪੀੜੀਆਂ ਕਰਨ ਤੁਹਾਨੂੰ ਐਸੀ ਕਿਰਤ ਕਮਾਵੋ
ਬਦਲ ਜਾਣ ਇਤਿਹਾਸ ਦੇ ਪੰਨੇ ਐਸੇ ਬੂਟੇ ਲਾਓ
ਬੇਗਮਪੁਰਾ ਵਸਾਓ ਸੰਗਤੇ ........

ਮੈਂ ਹਾਂ ਮਿਸ਼ਨਰੀ ਬੰਦਾ ਮਿਸ਼ਨ ਦੀ ਗੱਲ ਬਿਨਾਂ ਨਹੀਂ ਰਹਿ ਸਕਦਾ।
ਰਹਿਬਰਾਂ ਦੇ ਅਹਿਸਾਨ ਨੇ ਸਿਰ ਤੇ, ਚੁੱਪ ਕਰਕੇ ਨਹੀਂ ਬਹਿ ਸਕਦਾ।

ਮੰਜ਼ਿਲ ਦੇ ਵੱਲ ਤੁਰਦੇ ਜਾਣਾ, ਪਿੱਛੇ ਕਦੇ ਵੀ ਮੁੜਨਾ ਨਹੀਂ
ਇਕ ਪੈਨਲ ਤੇ ਡੱਟਕੇ ਰਹਿਣਾ ਹੋਰ ਕਿਤੇ ਵੀ ਜੁੜਨਾ ਨਹੀਂ
ਜਿਉਂਦੇ ਜੀਅ ਏਹ ਰੰਗ ਮਿਸ਼ਨ ਦਾ, ਅੰਦਰੋਂ ਕਦੇ ਨਹੀਂ ਲਹਿ ਸਕਦਾ।
ਰਹਿਬਰਾਂ ਦੇ ਅਹਿਸਾਨ ਨੇ . . . . . . . .

ਆਪਣੇ ਪੈਰੀਂ ਖੜ੍ਹਨਾ ਦੱਸਿਆ ਜਗਤ ਪਿਤਾ ਦੀ ਬਾਣੀ ਨੇ
ਹੱਕਾਂ ਦੇ ਲਈ ਲੜਨਾ ਦੱਸਿਆ ਕੀਤੀ ਹੋਈ ਵੰਡ ਕਾਣੀ ਨੇ
ਹੱਥ ਕਰਾਰੇ ਕੀਤੇ ਬਿਨ ਨਹੀਂ, ਮਹਿਲ ਮਨੂੰ ਦਾ ਢਹਿ ਸਕਦਾ
ਰਹਿਬਰਾਂ ਦੇ ਅਹਿਸਾਨ ਨੇ . . . . . . . .

ਝੰਡਾ ਚੱਕ ਬਗਾਵਤ ਵਾਲਾ, ਰਾਹ ਸੰਘਰਸ਼ ਦੇ ਪੈਣਾ ਹੈ
ਤਖ਼ਤ ਦਿੱਲੀ ਦੇ ਮਾਲਕ ਬਣਨਾ, ਇਹ ਸੰਵਿਧਾਨ ਦਾ ਕਹਿਣਾ ਹੈ
ਪੰਦਰਾਂ ਕਰਨ ਪੰਚਾਸੀਆਂ ਉੱਤੇ, ਰਾਜ ਕਦੇ ਨਹੀਂ ਸਹਿ ਸਕਦਾ
ਰਹਿਬਰਾਂ ਦੇ ਅਹਿਸਾਨ ਨੇ . . . . . . . .

ਅਸੀਂ ਹਾਂ ਮੂਲ ਨਿਵਾਸੀ ਦੇਸ਼ ਦੇ, ਸਾਨੂੰ ਪੁਰਖਿਆਂ ਦੱਸਿਆ ਏ
ਸੱਤਾ ਪ੍ਰਾਪਤ ਕਰਨੇ ਦੇ ਲਈ , ਆਪਣੀ ਕਮਰ ਨੂੰ ਕੱਸਿਆ ਏ
ਏਨੇ ਜੋਗੇ ਹੋ ਗਏ 'ਚੁੰਬਰਾ', ਦਿਲ ਆਪਣੇ ਦੀ ਕਹਿ ਸਕਦਾ
ਰਹਿਬਰਾਂ ਦੇ ਅਹਿਸਾਨ ਨੇ . . . . . . . .

ਵਲੋਂ : ਕੁਲਦੀਪ ਚੁੰਬਰ 98151-37254

ਅਸੀਂ ਓਸ ਭੀਮ ਦੇ ਦੀਵਾਨੇ ਹਾਂ ਦੀਵਾਨੇ
ਦੁਖੀਆਂ ਗਰੀਬਾਂ ਨਾਲ  ਜਿਸ ਦੇ ਯਰਾਨੇ।

ਓਹਦੇ ਸੰਗੀ ਸਾਥੀ ਹੌਕੇ ਹਾਵਿਆਂ 'ਚ ਸਿੰਨ੍ਹੇ
ਜਿਹਨਾਂ ਦੇ ਕਲੇਜੇ ਪਾਪੀ  ਵੈਰੀਆਂ ਨੇ ਵਿੰਨ੍ਹੇ
ਸਿਰੋਂ ਪੈਰਾਂ ਤੱਕ ਜਿਹਨਾਂ ਝੱਲੇ ਮੇਹਣੇ ਤਾਹਨੇ
ਦੁਖੀਆਂ ਗਰੀਬਾਂ ਨਾਲ ਭੀਮ ਦੇ . . . . . .

ਦੁੱਖਾਂ ਦੀ  ਕਹਾਣੀ  ਜਿਸ ਵਰਗ  ਦੀ ਲੰਮੀ
ਓਹਨਾਂ ਦੀਆਂ ਛੱਤਾਂ ਥੱਲੇ ਭੀਮ ਦਿੱਤੀ ਥੰਮੀ
ਹਾਕਮਾਂ  ਨੂੰ  ਕਲਮ  ਬਣਾ  ਗਈ  ਨਿਸ਼ਾਨੇ
ਦੁਖੀਆਂ ਗਰੀਬਾਂ ਨਾਲ ਭੀਮ ਦੇ . . . . . .

ਖੂਨ ਤੇ ਪਸੀਨੇ ਨਾਲ  ਭਿੱਜੇ  ਰਹਿਣ ਜਿਹੜੇ
ਦੁੱਖ ਗ਼ਮ ਜਿਹਨਾਂ ਦੇ ਨੇ ਬੈਠੇ ਆਕੇ ਵਿਹੜੇ
ਜਿਹਨਾਂ ਦੀਆਂ  ਸੁਰਾਂ  ਵਿਚ  ਦਰਦ ਤਰਾਨੇ
ਦੁਖੀਆਂ ਗਰੀਬਾਂ ਨਾਲ ਭੀਮ ਦੇ . . . . . .

ਆਰ ਪਰਿਵਾਰ  ਸਾਰਾ  ਕੌਮ  ਸਿਰੋਂ  ਵਾਰਿਆ
ਆਪਣੇ ਅਖੀਰੀ ਦਮ ਤਾਈਂ ਵੀ ਨਾ ਹਾਰਿਆ
ਭਲਾਈ  ਲਈ ਲੱਭਦਾ ਹੀ  ਰਿਹਾ ਓਹ ਬਹਾਨੇ
ਦੁਖੀਆਂ ਗਰੀਬਾਂ ਨਾਲ ਭੀਮ ਦੇ . . . . . .

ਅਸੀਂ ਭੀਮ ਮਰ ਕੇ ਵੀ ਭੁੱਲ ਨਹੀਂਓ ਸਕਦੇ
ਹੋਰ  ਕਿਸੇ  ਉੱਤੇ  ਕਦੇ ਡੁੱਲ੍ਹ ਨਹੀਂਓ ਸਕਦੇ
'ਚੁੰਬਰਾ' ਨਾ ਕਦੇ ਅਸੀਂ ਓਸ ਲਈ ਬੇਗ਼ਾਨੇ
ਦੁਖੀਆਂ ਗਰੀਬਾਂ ਨਾਲ ਭੀਮ ਦੇ . . . . . .

 ਲੇਖਕ : ਕੁਲਦੀਪ ਚੁੰਬਰ ,  98151-37254