ਕਦੀ ਬਾਗ਼ੀ ਕਦੀ ਇੰਨਕਲਾਬੀ
ਕਦੀ ਅੰਨਦਾਤਾ ਕਹਾਉਂਦਾ ਹਾਂ।
ਹੱਥੀਂ ਅੱਟਣ, ਪੈਰੀਂ ਛਾਲੇ
ਮੈਂ ਕਿਰਸਾਨ ਕਹਾਉਂਦਾ ਹਾਂ ........

ਖੇਤਾਂ ਦੀ ਆਨ ਸ਼ਾਨ ਹਾਂ ਮੈਂ
ਸਿੱਧਾ ਸਾਦਾ ਇਨਸਾਨ ਹਾਂ ਮੈਂ
ਮੈਂ ਕਿਰਸਾਨ ਕਹਾਉਂਦਾ ਹਾਂ.........

ਡੰਗਰਾਂ ਦੇ ਨਾਲ ਡੰਗਰ ਹੋਈਏ
ਮਿੱਟੀ ਦੇ ਨਾਲ ਮਿੱਟੀ
ਨਿੱਕੇ ਨਿੱਕੇ ਸੁਪਨੇ ਸਾਡੇ
ਮਿਲ ਜਾਵਣ ਵਿੱਚ ਮਿੱਟੀ
ਪੜ੍ਹ ਲਿਖ ਬੱਚੇ ਬਣ ਜਾਣ ਅਫ਼ਸਰ
ਹਰ ਪਲ ਇਹੀ ਮਨਾਉਂਦਾ ਹਾਂ......
ਸਿੱਧਾ ਸਾਦਾ ਇਨਸਾਨ ਹਾਂ .......

ਨੱਕੇ ਮੋੜਨੇ, ਪਾਣੀ ਲਾਉਣਾ
ਬੀਜ ਬੀਜਣੇ, ਫ਼ਸਲ ਉਗਾਉਣਾ
ਰਾਖੀ ਕਰਨਾ, ਵਾਢੀ ਕਰਨਾ
ਕਰ ਛਿੜਕਾਅ ਫ਼ਸਲ ਬਚਾਉਣਾ
ਸਦੀਆਂ ਤੋਂ ਇਹੀ ਕੰਮ ਨੇ ਮੇਰੇ
ਭੋਂਇ ਤੇ ਹਲ ਚਲਾਉਂਦਾ ਹਾਂ.......
ਸਿੱਧਾ ਸਾਦਾ ਇਨਸਾਨ ਹਾਂ .......

ਹੋਇ ਫ਼ਸਲ ਚੰਗੀ ਤਾਂ ਖੁਸ਼ ਹੋ ਜਾਵਾਂ
ਘਰ ਆਵੇ ਤਾਂ ਭੰਗੜੇ ਪਾਵਾਂ
ਮੀਂਹ ਹਨੇਰੀ ਬੱਦਲ ਦੇਖ ਕੇ
ਬੁਰੀ ਤਰ੍ਹਾਂ ਨਾਲ ਮੈਂ ਘਬਰਾਵਾਂ
ਖਾ ਕੇ ਰੁੱਖੀ ਮਿੱਸੀ ਘਰ ਦੀ
ਰੱਬ ਦਾ ਸ਼ੁਕਰ ਮਨਾਉਂਦਾ ਹਾਂ .......
ਸਿੱਧਾ ਸਾਦਾ ਇਨਸਾਨ ਹਾਂ ........

ਧਰਤੀ ਮਾਂ ਨੂੰ ਮਾਂ ਮੈਂ ਸਮਝਾਂ
ਜੋ ਪੇਟ ਲੋਕਾਈ ਦਾ ਭਰਦੀ ਹੈ
ਮੁੱਲ ਇਸ ਦਾ ਪੈਣ ਨਹੀਂ ਦੇਣਾ
ਅੱਗੇ ਰੱਬ ਦੀ ਮਰਜ਼ੀ ਹੈ।
ਲੈ ਦੋ ਪੁੱਤਾਂ ਦੀ ਦਾਤ ਮੈਂ ਇੱਕ ਫ਼ੌਜ਼ੀ
ਇੱਕ ਕਿਰਸਾਨ ਬਣਾਉਂਦਾ ਹਾਂ .......
ਸਿੱਧਾ ਸਾਦਾ ਇਨਸਾਨ ਹਾਂ ........

ਹੋਵੇ ਸੱਤਾਰੂੜ੍ਹ ਜਾਂ ਸਰਕਾਰ ਕੋਈ
ਆਮ ਆਦਮੀ ਨਾ ਪੇਖਦਾ ਹੈ
ਕੌਣ ਜਿੱਤਿਆ ਕੌਣ ਹਾਰਿਆ
ਕੋਈ ਇਨਸਾਨ ਨਾ ਵੇਖਦਾ ਹੈ
ਰੋਟੀਆਂ ਦੋ ਕਮਾਵਣ ਦੇ ਲਈ
ਪੂਰਾ ਤਾਣ ਲਗਾਉਂਦਾ ਹਾਂ ........
ਸਿੱਧਾ ਸਾਦਾ ਇਨਸਾਨ ਹਾਂ ........

ਕੋਈ ਵੀ ਮੇਰਾ ਦਰਦ ਨਾ ਜਾਣੇ
ਪਲਣ ਗਰੀਬੀ ਵਿੱਚ ਨਿਆਣੇ
ਠੰਡੀਆਂ ਯੱਖ ਰਾਤਾਂ ਤਿੱਖੜ ਦੁਪਹਿਰੇ
ਮਿਹਨਤ ਦਾ ਕੋਈ ਮੁੱਲ ਨਾ ਜਾਣੇ
ਸੜਕੀਂ ਰੁੱਲਦੀ ਬਿਨ ਮੁੱਲ ਦੀ
ਕਿਸਾਨੀ ਜਿਣਸ ਦਿਖਾਉਂਦਾ ਹਾਂ ........
ਸਿੱਧਾ ਸਾਦਾ ਇਨਸਾਨ ਹਾਂ ........

ਕੋਈ ਹੱਕ ਕਿਸੇ ਦਾ ਖੋਹ ਨਹੀਂ ਸਕਦਾ
ਇਹ ਸੱਭ ਕੁੱਝ ਤਾਂ ਬੱਸ ਵਕਤੀ ਹੈ
ਬੰਦਾ ਬੰਦੇ ਨੂੰ ਜੀਣ ਨਾ ਦੇਵੇ
ਜ਼ਿੰਦਗੀ ਵਾਹਿਗੁਰੂ ਦੀ ਸ਼ਕਤੀ ਹੈ
ਭੁੱਖੇ ਦੇ ਮੂੰਹ ਬੁਰਕੀ ਪਾ ਕੇ
ਜੀਵਨ ਮਾਣ ਵਧਾਉਂਦਾ ਹਾਂ ........
ਸਿੱਧਾ ਸਾਦਾ ਇਨਸਾਨ ਹਾਂ .........
ਵਿੰਨੀਪੈਗ,  ਕੈਨੇਡਾ

ਭਾਵੇਂ ਦੇਹ ਸਾਨੂੰ ਮਾਰ
ਨਾਲ ਖੁੰਢੀ ਤਲਵਾਰ
ਠੰਡੇ ਪਾਣੀ ਵਾਲੀ ਧਾਰ
ਨਹੀਂ ਹੱਟਣਾ ਪਿਛਾਂਹ
ਹੁਣ ਜਾਣਾ ਹੈ ਅਗਾਂਹ
ਓਏ ਸੁਣ ਹਾਕਮਾਂ
ਅਸੀਂ ਮੰਨਣੀ ਨਹੀਂ ਈਨ
ਹੁਣ ਤੇਰੀ ਜ਼ਾਲਮਾਂ ....

ਜਿੰਨ੍ਹਾਂ ਪਾਣੀ ਕਕਰੀਲਾ
ਓਨਾ ਬੰਦਾ ਅਣਖੀਲਾ
ਜ਼ਿੱਦੀ ਹਾਕਮ ਹਠੀਲਾ
ਜ਼ਮੀਨ ਸਾਡੀ ਜੇ ਤੂੰ ਵੇਚੇ
ਪੱਕੇ ਪੈ ਜਾਣ ਪੇਚੇ
ਓਏ ਸੁਣ ਹਾਕਮਾਂ
ਭਾਵੇਂ ਕੱਢ ਲੈ ਤੂੰ ਜਾਨ
ਹੁਣ ਸਾਡੀ ਕਾਲਮਾਂ ....

ਸਾਨੂੰ ਕੱਲਾ ਨਾ ਤੂੰ ਜਾਣੀਂ
ਸਾਡੀ ਜ਼ਾਤ ਤੂੰ ਪਛਾਣੀਂ
ਪਾ ਨਾ ਪਾਣੀ 'ਚ ਮਧਾਣੀ
ਅਸੀਂ ਮੰਨਦੇ ਨਾ ਹਾਰ
ਗੱਲ ਹੋਊ ਆਰ ਪਾਰ
ਓਏ  ਸੁਣ  ਹਾਕਮਾਂ
ਸਾਡੇ ਹੱਕ ਇੱਥੇ ਰੱਖ
ਮੰਗ ਖ਼ੈਰ ਹਾਕਮਾ ....

ਸਾਡੇ ਦੁੱਖ ਨਾ ਤੂੰ ਜਾਣੇ
ਸਾਡੀ ਜ਼ਾਤ ਨਾ ਪਛਾਣੇ
ਤੇਰੇ ਮੁੱਕ ਜਾਣ ਦਾਣੇ
ਤੈਨੂੰ ਕਿਹਾ ਸੌ ਵਾਰ
ਸਾਨੂੰ ਦੇਵੇਂ ਦੁਤਕਾਰ
ਓਏ  ਸੁਣ  ਹਾਕਮਾਂ
ਹੁਣ ਇੱਦਾਂ ਨਹੀਓਂ ਹੋਣਾ
ਕਰ ਲੈ ਪੱਕ ਹਾਕਮਾਂ ....

ਕਰ  ਕੰਮ  ਤੂੰ  ਮਹਾਨ
ਚੰਗਾ ਆਖੇ ਇਹ ਜਹਾਨ
ਹੈ ਵੰਗਾਰਦਾ ਕਿਸਾਨ
ਲੋਕ ਕਹਿਣ ਇਹ ਸੱਚ
ਬਚ ਸਕਦੈਂ ਤਾਂ ਬੱਚ
ਓਏ ਸੁਣ ਹਾਕਮਾਂ
ਇੱਥੇ ਗਲਣੀਂ ਨਹੀਂ ਦਾਲ
ਹੁਣ ਤੇਰੀ ਜ਼ਾਲਮਾਂ ....

ਵਿੰਨੀਪੈਗ, ਕੈਨੇਡਾ
ਸੰਪਰਕ - 001 204 999 9240 

(ਮੇਰੀ ਇਹ ਕਵਿਤਾ ਸਮਰਪਿਤ ਹੈ, ਮੇਰੇ ਮੰਮੀ ਪਾਪਾ ਅਤੇ ਉਹਨਾਂ ਸਾਰੇ ਲੋਕਾਂ ਨੂੰ ਜੋ ਮੁਲਕ ਦੀ ਵੰਡ ਵੇਲੇ ਪਾਕਿਸਤਾਨ ਤੋਂ ਹਿੰਦੁਸਤਾਨ ਤੇ ਹਿੰਦੁਸਤਾਨ ਤੋਂ ਪਾਕਿਸਤਾਨ ਗਏ ....)
ਮੇਰੇ ਪਾਪਾ ਜੀ ਦੇ ਜਮਾਤੀ ਦੋਸਤ ਦੇ ਫੋਨ ਤੇ ਪੁੱਛੇ ਗਏ ਸਵਾਲ ਕਿ, " ਆ ਰਹਾ ਹੂੰ ਮਿਲਣੇ ਕੋ, ਕਿਆ ਚਾਹੀਏ ਕਿਆ ਲਾਊਂ ਤੂ ਬਤਾ..." ਦੇ ਜਵਾਬ ਵਿੱਚ ਇਹ ਕਵਿਤਾ ਹੋਂਦ ਵਿੱਚ ਆਈ....

"ਮੁੱਠੀ ਭਰ ਮਿੱਟੀ ਮੇਰੇ ਖੇਤ ਦੀ"

ਡਾ. ਪ੍ਰਿਤ ਪਾਲ ਕੌਰ ਚਾਹਲ, ਕੈਨੇਡਾ

 ਖੇਤਾਂ ਦੀ ਮਹਿਕ, ਫਿਰਨੀ ਦੀ ਖੁਸ਼ਬੂ ਤੇ ਕਿੰਨੀ ਸਾਰੀ ਪਿੰਡ ਦੀ ਹਵਾ
ਮੁੱਠੀ ਭਰ ਮਿੱਟੀ ਮੇਰੇ ਖੇਤ ਦੀ
ਹੋ ਸਕਿਆ ਤਾਂ ਲੈ ਆਵੀਂ ਦੋਸਤਾ ।

ਤੂੜ੍ਹੀ ਵਾਲੇ ਢਾਰੇ ਵਿੱਚ
ਦੱਬੇ ਹੋਏ ਬੰਟੇ ਨੇ
ਹਾਕੀ ਗੁੱਲੀ ਡੰਡੇ ਉੱਤੇ
ਮਿਲੀ ਸੀ ਸਜ਼ਾ
ਸੋ ਕੁੱਝ ਗੱਲਾਂ ਦਿਲਾਂ ਦੀਆਂ
ਤੇ ਥੋੜ੍ਹੀ ਜਿਹੀ ਜਵਾਨੀ ਦੀ ਅਦਾ
ਮੁੱਠੀ ਭਰ ਮਿੱਟੀ ......

ਕਰਦਾ ਹਾਂ ਬੰਦ ਅੱਖਾਂ
ਆਂਵਦੀ ਏ ਯਾਦ ਖੂਹ ਦੀ
ਪਾਣੀ ਮਿੱਠਾ ਸ਼ਰਬਤ ਜਿਹਾ
ਕੁੱਝ ਬੇਰ ਮਲ੍ਹਿਆਂ ਦੇ
ਜੰਗਲ ਜਲੇਬੀਆਂ ਤੇ
ਪਹਿਲੀ ਤੋੜ ਦਾ ਹਲਕਾ ਨਸ਼ਾ
ਮੁੱਠੀ ਭਰ ਮਿੱਟੀ.....

ਆਂਵਦੀ ਏ ਯਾਦ ਜਦੋਂ
ਪਿੰਡ ਦੀਆਂ ਗਲੀਆਂ ਦੀ
ਜਾਂਵਦੀ ਏ ਰੂਹ ਤੜਪਾ
ਚਾਚੀ ਫੱਤੋ ਦੀਆਂ ਗੱਲਾਂ
ਗਾਲ੍ਹੀਆਂ ਤੇ ਪਿਆਰ ਉੱਤੇ
ਅਜੇ ਤੱਕ ਦਿਲ ਹੈ ਫ਼ਿਦਾ
ਉੱਠਦੀ ਹੈ ਹੂਕ ਦਿਲ 'ਚੋਂ
ਆਵੇ ਜਦੋਂ ਯਾਦ ਪਿੰਡ ਦੀ ਫਿਜ਼ਾ
ਮੁੱਠੀ ਭਰ ਮਿੱਟੀ.....

ਰਸੋਈ ਵਾਲੀ ਪੜਛੱਤੀ ਉੱਤੇ
ਪਿਆ ਹੋਊ ਪਿੰਨਾ ਇੱਕ
ਮਾਝਾ ਲੱਗੀ ਡੋਰਾ ਵਾਲਾ
ਥੱਬਾ ਇੱਕ ਗੁੱਡੀਆਂ ਦਾ
ਲੈ ਕੇ ਨਾਮ ਦੋਸਤੀ ਦਾ
ਵੱਲ ਮੇਰੇ ਦੇਸ਼ ਨੂੰ ਉਡਾਈਂ ਦੋਸਤਾ
ਮੁੱਠੀ ਭਰ ਮਿੱਟੀ.....

ਆਂਵੇਂਗਾ ਤਾਂ ਦੇਖ ਲਵੀਂ
ਰੱਖੀਆਂ ਨੇ ਸਾਂਭ ਚੀਜ਼ਾਂ ਕਈ
ਝੱਲੇ ਨਹੀੰ ਜਾਣੇ ਸਾਥੋਂ ਚਾਅ
ਇੱਕ ਹੈ ਰੁਮਾਲ ਤੋਹਫ਼ਾ
ਸਾਂਭ ਰੱਖੇ ਹੰਝੂ ਵਿੱਚ
ਸੀ ਲਈ ਜਦੋਂ ਪਿੰਡ ਤੋਂ ਵਿਦਾ
ਮੁੱਠੀ ਭਰ ਮਿੱਟੀ.....

ਟੈਲੀਫੋਨ ਚੁੰਮ ਲਵਾਂ
ਜਿਸ ਵਿੱਚੋਂ ਬੋਲਿਐਂ ਤੂੰ
ਬੱਸ ਇੱਕ ਵਾਰੀ ਸ਼ਕਲ ਦਿਖਾ
ਘੁੱਗ ਵੱਸੋ ਖੁਸ਼ ਰਹੋ
ਦਿੰਦਾ ਮੇਰਾ ਦਿਲ ਇਹ ਦੁਆ
ਸਭ ਨੂੰ ਸਲਾਮ ਮੇਰੀ
ਸੱਭ ਨੂੰ ਪਿਆਰ ਮੇਰਾ
ਇਹੀ ਮੇਰੀ ਰੱਬ ਨੂੰ ਦੁਆ
ਨਹੀਂ ਚਾਹੀਦਾ ਕੁੱਝ ਤੇਰੇ ਸਿਵਾ
ਬੱਸ ਇਕ ਵਾਰੀ ਸ਼ਕਲ ਦਿਖਾ
ਨਹੀਂ ਚਾਹੀਦਾ ਕੁੱਝ ਤੇਰੇ ਸਿਵਾ
ਮੁੱਠੀ ਭਰ ਮਿੱਟੀ ਮੇਰੇ ਖੇਤ ਦੀ
ਹੋ ਸਕਿਆ ਤਾਂ ਲੈ ਆਵੀਂ ਦੋਸਤਾ ।

ਪੀ.ਏ.ਯੂ. ਲੁਧਿਆਣਾ/ ਵਿੰਨੀਪੈਗ (ਕੈਨੇਡਾ)

ਮਿਲੇ ਕੋਈ ਵੀ ਜੋ ਕਿਸੇ ਗਲੀ ਮੋੜ ਤੇ,
ਸਮਝਾਓ ਓਸ ਨੂੰ ਇਹ ਦੋਵੇਂ ਹੱਥ ਜੋੜ ਕੇ
ਜੇ ਨਾ ਹੋਊ ਕਿਰਸਾਨ
ਖਾਊ ਕਿੱਥੋਂ ਫਿਰ ਜਹਾਨ
ਕੋਈ ਨਾ ਖਾਵੇ ਸੋਨਾ ਚਾਂਦੀ
ਦੋ ਰੋਟੀਆਂ ਹਰੇਕ ਹੀ ਦੀ ਲੋੜ ਵੇ
ਸਮਝਾਓ ਓਸ ਨੂੰ ਇਹ ....

ਕੁੱਝ ਘਰਾਣਿਆਂ ਦੀ ਵੇਖ ਅੱਜ ਸ਼ਾਨ ਨੂੰ
ਲਾਉਣ ਵੱਟੇ ਮੁਲਕ ਦੀ ਸ਼ਾਨ-ਬਾਨ ਨੂੰ
ਲੈਂਦੇ ਕਰਜ਼ੇ ਉਹ ਚੁੱਕ
ਭੱਜਣ ਅੱਡੀਆਂ ਨੂੰ ਚੁੱਕ
ਫਿਰਨ ਕਿੰਗਰੇ ਉਹ ਦੇਸ਼ ਵਾਲੇ ਢਾਣ ਨੂੰ
ਕੁੱਝ ਘਰਾਣਿਆਂ ਦੀ ....

ਉਹਨਾਂ ਆਖਿਆ ਸੀ ਬੜੇ ਹੱਥ ਜੋੜ ਕੇ
ਭਾੱਜੀ ਕਨੂੰਨਾਂ ਵਾਲੀ ਦੇਣੀ ਉਹਨਾਂ ਮੋੜ ਵੇ
ਹੋਣ ਵਾਪਸ ਕਾਨੂੰਨ
ਸਵਾਰ ਸਿਰ ਤੇ ਜਨੂੰਨ
ਦੇਣੇ ਲੱਕ ਕਿਸਾਨਾਂ ਦੇ ਇਹਨਾਂ ਤੋੜ ਵੇ
ਉਹਨਾਂ ਆਖਿਆ ਸੀ ਬੜੇ .....

ਸਮਝੋ ਘਰਾਣਿਆਂ ਦੀ ਪੁੱਠੜੀ ਇਹ ਚਾਲ ਨੂੰ
ਕਰਨ ਮੁੱਠ ਵਿੱਚ ਜਿਹੜੇ ਹੋਰਨਾਂ ਦੇ ਮਾਲ ਨੂੰ
ਹੁਣ ਭੋਲਪੁਣਾ ਛੱਡ
ਪਛਾਣ ਆਪਣੇ ਤੂੰ ਹੱਕ
ਹੋਂਦ ਆਪਣੀ ਲਈ ਘਾਲਣਾਂ ਹੁਣ ਘਾਲ ਤੂੰ
ਸਮਝੋ ਏ ਘਰਾਣਿਆਂ ਦੀ ....

ਲੱਗੀ ਮੁਲਕ ਨੂੰ ਹੱਥ ਵਿੱਚ ਲੈਣ ਵਾਲੀ ਹੋੜ ਹੈ
ਇਹ ਘਰਾਣੇ ਜਿਵੇਂ ਖਾਜ ਵਿੱਚ ਕੋਹੜ ਹੈ
'ਕੱਲਾ ਕਿਰਸਾਨ ਹੀ ਨਹੀਂ
ਮਰੂ ਆਮ ਆਦਮੀ ਵਹੀਂ
ਹੁਣ ਸਹੇ ਨਹੀਂ ਪਹੇ ਨੂੰ ਬਚਾਉਣ ਦੀ ਲੋੜ ਹੈ
ਲੱਗੀ ਮੁਲਕ ਨੂੰ ਹੱਥ ਵਿੱਚ .....

ਕਰੋ ਨਾਂਹ ਇਹ ਘਰਾਣਿਆਂ ਦੇ ਮਾਲ ਨੂੰ
ਅਪਣਾਅ ਕੇ ਦੇਸ਼ 'ਚ ਪੈਦਾ ਹੋਏ ਮਾਲ ਨੂੰ
ਕਰੋ ਸੱਚਾ ਵਾਅਦਾ, ਨਹੀਂ ਝੂਠਾ
ਫੜੇ ਨਾ ਕੋਈ ਹੱਥ ਵਿੱਚ ਠੂਠਾ                   
'ਕੱਠੇ ਹੋ ਕੇ ਅਪਣਾਈਏ ਏਸ ਹੀ ਖਿਆਲ ਨੂੰ
ਕਰੋ ਨਾਂਹ ਇਹ ਘਰਾਣਿਆਂ .....

ਵਿੰਨੀਪੈਗ, ਕੈਨੇਡਾ  
ਸੰਪਰਕ-001 2049999240

ਨਿਭਣ ਪੱਕੇ ਰਿਸ਼ਤੇ ਮਿੱਟੀ ਦੇ
ਹੋਣ ਰਿਸ਼ਤੇ ਕੱਚੇ ਅੱਟੀ ਸੱਟੀ ਦੇ
ਮਿੱਟੀ ਦੇ ਨਾਲ ਮਿੱਟੀ ਹੋਈਏ
ਅੱਖ ਚੁੱਕ ਨਾ ਵੇਖਣ ਦੇਈਏ
ਫਿਰ ਆਪਣੀ ਹੱਕੀ ਖੱਟੀ 'ਤੇ
ਪੱਕੇ ਰਿਸ਼ਤੇ ਨਿਭਦੇ ਮਿੱਟੀ ਦੇ ….

ਦਸਾਂ ਨਹੁੰਆਂ ਦੀ ਕਿਰਤ ਹਾਂ ਕਰਦੇ
ਸੌ ਲੋਕਾਂ ਦਾ ਢਿੱਡ ਹਾਂ ਭਰਦੇ
ਰੁੱਖੀ ਮਿੱਸੀ ਖਾ ਸ਼ੁਕਰ ਹਾਂ ਕਰਦੇ
ਫਿਰ ਵੀ ਸਾਡੇ ਹੱਕ ਨੇ ਮਰਦੇ
ਸੱਭ ਦੇ ਹੱਕ ਬਰਾਬਰ ਕਹਿੰਦੇ
ਪਰ ਸਾਡੇ ਹੱਕ ਨਾ ਵੱਟੀਦੇ ....

ਨਾਲ ਮਿੱਟੀ ਦੇ ਮਿੱਟੀ ਹੋਈਏ
ਨਾਲ ਪਸੀਨੇ ਖ਼ੂਨ ਵੀ ਚੋਈਏ
ਅਸੀਂ ਤਾਂ ਖੇਤਾਂ ਸੰਗ ਹੀ ਸੋਹੀਏ
ਕਿਉਂ ਅਨਿਆਂ ਸਿਰ 'ਤੇ ਢੋਈਏ
ਰੱਖਦੇ ਸਦਾ ਮੁਸਕਾਨ ਬੁੱਲ੍ਹਾਂ ਤੇ  
ਕਿ ਪਾ ਛੱਜੀਂ ਦੁੱਖ ਨਹੀਂ ਛੱਟੀਦੇ ….

ਬੇ-ਮੌਸਮੀ  ਮੀਂਹ ਜੇ  ਪੈ  ਜਾਏ
ਜਿਣਸ ਖੇਤੀਂ ਰੁਲਦੀ ਰਹਿ ਜਾਏ
ਸੋਕਾ ਜਾਂ ਹੜ੍ਹ ਫ਼ਸਲ ਵੀ ਲੈ ਜਾਏ
ਡੰਗਰ ਵੱਛਾ ਭੁੱਖਾ ਮਰ ਜਾਏ
ਫਿਰ ਵੀ ਭੋਰਾ ਦਿਲ ਨਾ ਛੱਡਦੇ  
ਕਿ ਕਿਸੇ ਅੱਗੇ ਦੁੱਖ ਨਹੀਂ ਰੱਟੀਦੇ ….

ਕਿਸੇ ਅੱਗੇ ਨਾ ਹੱਥ ਫੈਲਾਉਂਦੇ
ਲੋਕੀਂ ਇਹੀ ਗੱਲ ਸਲਾਹੁੰਦੇ
ਈਮਾਨਦਾਰੀ ਨਾਲ ਰਿਜ਼ਕ ਕਮਾਉਂਦੇ
ਖੁਸ਼ੀ 'ਚ ਰੱਬ ਦੇ ਸੋਹਲੇ ਗਾਉਂਦੇ
ਰਹਿੰਦੇ ਰੱਬ ਦੀ ਰਜ਼ਾ 'ਚ ਰਾਜ਼ੀ
ਨਾ ਡਰਦੇ ਪੋਚਣੋਂ ਵੈਰੀ ਦੀ ਫੱਟੀ ਦੇ ....

ਸੱਚ ਹੀ ਜੱਟ ਦੀ ਜੂਨ ਬੁਰੀ ਹੈ
ਵਿੱਚ ਝੋਰਿਆਂ ਹਯਾਤ ਖੁਰੀ ਹੈ
ਸਾਹਵਾਂ ਦੀ ਵੀ ਪੂੰਜੀ ਭੁਰੀ ਹੈ
ਹੱਕਾਂ ਤੇ ਜਦ ਵੀ ਚੱਲੀ ਛੁਰੀ ਹੈ
ਸੰਸਿਆਂ ਦੇ ਵਿੱਚ ਜ਼ਿੰਦ ਗਵਾਚੀ
ਕਿ ਵਿੱਚ ਦੁੱਖਾਂ ਦਿਨ ਨੇ ਕੱਟੀਦੇ …

ਸੱਚੇ ਦਿਲੋਂ ਖ਼ੈਰ ਸੱਭ ਦੀ ਮੰਗਣ     
ਨੁਕਸਾਨ/ਘਾਟ ਨੂੰ ਛਿੱਕੇ ਟੰਗਣ
ਦੁਸ਼ਮਣ  ਨੂੰ ਨਾ  ਦੇਵਣ ਖੰਘਣ
ਪਰ ਇੱਕ ਗੱਲ ਕਹਿਣੋਂ ਵੀ ਨਾ ਸੰਗਣ ...
" ਕੀ ਆਪਣਾ ਹੱਕ ਵੀ ਅਸੀਂ ਮੰਗੀਏ ਨਾ ??
ਜ਼ਮੀਰ ਪੁੱਛਦੀ ਇਸਦੀ ਨਿਜਾਤ ਕੀ ਹੈ ???
ਆਈ 'ਤੇ ਆ ਰੁਖ ਦਰਿਆਵਾਂ ਦੇ ਵੀ ਮੋੜ ਦੇਈਏ,
ਕਕਰੀਲੀ ਧਾਰ ਪਾਣੀ ਦੀ ਫਿਰ ਬਿਸਾਤ ਕੀ ਹੈ … "

 ਵਿੰਨੀਪੈਗ, ਕੈਨੇਡਾ
ਸੰਪਰਕ - +1 (431) 557-5005