29 ਅਗਸਤ 2022

ਉਨ੍ਹਾਂ ਹੱਥਾਂ ‘ਚ ਜਾ ਰਿਹੈ ਅਕਾਲੀ ਦਲ ਜਿਨ੍ਹਾਂ ਦੀ ਪੰਥ ਨੂੰ ਕੋਈ ਦੇਣ ਨਹੀਂ-ਝੂੰਦਾਂ

ਚਰਖ਼ੇ ਦੀ ਘੂਕ ਨਾ ਸੁਣੇ, ਸੁੰਞੇ ਪਏ ਨੇ ਤ੍ਰਿੰਞਣਾਂ ਦੇ ਵਿਹੜੇ।

ਸਾਰਾ ਦੇਸ਼ ਚਾਹੁੰਦੈ ਕਿ ਕੇਜਰੀਵਾਲ ਅਗਲੇ ਪ੍ਰਧਾਨ ਮੰਤਰੀ ਬਣਨ- ਸਿਸੋਦੀਆ

ਆਓ ਨੀ ਸਈਓ ਰਲ਼ ਵੇਖਣ ਚਲੀਏ, ਰਾਂਝੇ ਖੂਹਾ ਲਵਾਇਆ ਈ।

ਤਿਲੰਗਾਨਾ: ਸ਼ਾਹ ਦੀ ਜੁੱਤੀ ਫੜੀ ਲਿਜਾਂਦੇ ਭਾਜਪਾ ਸੂਬਾ ਪ੍ਰਧਾਨ ਦੀ ਵੀਡੀਓ ਵਾਇਰਲ- ਇਕ ਖ਼ਬਰ

ਕਰ ਸੰਤਾਂ ਦੀ ਸੇਵਾ, ਸੰਤ ਤੈਨੂੰ ਫਲ਼ ਦੇਣਗੇ।

ਸੰਸਦ ਵਿਚ ਵਕੀਲਾਂ ਦੀ ਗਿਣਤੀ ਘਟੀ- ਜਸਟਿਸ ਰਾਮੰਨਾ

ਜਸਟਿਸ ਸਾਬ੍ਹ! ਜਿਨ੍ਹਾਂ ਦੀ ਗਿਣਤੀ ਵਧੀ ਉਨ੍ਹਾਂ ਦਾ ਜ਼ਿਕਰ ਵੀ ਕਰ ਦਿੰਦੇ।

ਸ਼੍ਰੋਮਣੀ ਅਕਾਲੀ ਦਲ ਦੇ ਹਰਿਆਣਾ ਦੇ ਕੁਝ ਮੈਂਬਰਾਂ ਨੇ ਸੁਖਬੀਰ ਬਾਦਲ ‘ਚ ਪੂਰਨ ਭਰੋਸਾ ਪ੍ਰਗਟਾਇਆ-ਇਕ  ਖ਼ਬਰ

ਇਹ ਭਰੋਸਾ ਇੰਜ ਹੀ ਰੱਖੋ ਭਾਈ ਜਿੰਨਾ ਚਿਰ ਅਕਾਲੀ ਦਲ ਦਾ ਪੂਰਾ ਭੋਗ ਨਹੀਂ ਪੈਂਦਾ।

ਅਵਤਾਰ ਸਿੰਘ ਹਿਤ ਦੇ ਮਾਮਲੇ ‘ਚ ਜਥੇਦਾਰ ਹਰਪ੍ਰੀਤ ਸਿੰਘ ਚੁੱਪ ਕਿਉਂ ਹਨ ?- ਕਾਲਕਾ

ਹਿਜ਼ ਮਾਸਟਰਜ਼ ਵਾਇਸ।

ਬੇਅਦਬੀ ਮਾਮਲੇ ਦੇ ਇਨਸਾਫ਼ ਲਈ ਲੋਕਾਂ ਦੀ ਉਮੀਦ ਟੁੱਟਣ ਨਹੀਂ ਦੇਵਾਂਗੇ- ਸੰਧਵਾਂ

ਖ਼ਾਕ ਹੋ ਜਾਏਂਗੇ ਹਮ ਤੁਮ ਕੋ ਖ਼ਬਰ ਹੋਨੇ ਤੱਕ।

ਗੱਦੇ ‘ਤੇ ਸੌਣ ਵਾਲ਼ੇ ਆਸ਼ੂ ਨੂੰ ਤਖ਼ਤਪੋਸ਼ ‘ਤੇ ਸੌਣਾ ਪਿਆ- ਇਕ ਖ਼ਬਰ

ਨਰਮ ਸਰੀਰਾਂ ਨੂੰ ਪੈ ਗਏ ਮਾਮਲੇ ਭਾਰੀ।

ਸੁਪਰੀਮ ਕੋਰਟ ਵਲੋਂ ਯੋਗ ਗੁਰੂ ਰਾਮਦੇਵ ਦੀ ਝਾੜ-ਝੰਬ- ਇਕ ਖ਼ਬਰ

ਦੋ ਪਈਆਂ ਕਿਧਰ ਗਈਆਂ, ਸਦਕਾ ਢੂਈ ਦਾ।

ਸਰਕਾਰ ਦੀ ਕਾਰਵਾਈ ਤੋਂ ਡਰਨ ਵਾਲੇ ਨਹੀਂ ਕਾਂਗਰਸੀ ਵਰਕਰ- ਵੜਿੰਗ

ਖੂਹ ਬੋਤੀ ਕਿਆਰੀਂ ਪੋਤੀ, ਗੰਡਾ ਸੂੰਹ ਦਾ ਲਾਣਾ ਚਲਦਾ।

ਕਿਸਾਨਾਂ ਵਲੋਂ ‘ਆਪ’ ਸਰਕਾਰ ਨੂੰ ਸਬਰ ਨਾ ਪਰਖਣ ਦੀ ਚਿਤਾਵਨੀ- ਇਕ ਖ਼ਬਰ

ਤੇਰਾ ਕੱਖ ਨਹੀਂ ਬਚਨੀਏਂ ਰਹਿਣਾ, ਛੜਿਆਂ ਦੇ ਹੱਕ ਮਾਰ ਕੇ।

ਨਿਤੀਸ਼ ਕੁਮਾਰ ਪ੍ਰਧਾਨ ਮੰਤਰੀ ਦੇ ਅਹੁਦੇ ਲਈ ‘ਮਜ਼ਬੂਤ ਉਮੀਦਵਾਰ’ ਹੋ ਸਕਦੇ ਹਨ-ਤੇਜੱਸਵੀ ਯਾਦਵ

ਜਿਹੜਾ ਮੂਹਰਲੀ ਗੱਡੀ ਦਾ ਬਾਬੂ, ਉਹੀਓ ਮੇਰਾ ਵੀਰ ਕੁੜੀਓ।

ਹੁਣ ਸੁਖਪਾਲ ਖਹਿਰਾ ਤੇ ਰਾਜਾ ਵੜਿੰਗ ਹੋਏ ਆਹਮੋ ਸਾਹਮਣੇ-ਇਕ ਖ਼ਬਰ

ਕੁੰਢੀਆਂ ਦੇ ਸਿੰਙ ਫ਼ਸ ਗਏ, ਕੋਈ ਨਿਕਲੂ ਵੜੇਂਵੇਂ ਖਾਣੀ।

ਕੈਪਟਨ ਸਰਕਾਰ ਵੇਲੇ ਹੋਏ ਕਰੋੜਾਂ ਦੇ ਗ਼ਬਨ ਦੀ ਜਾਂਚ ਕਰਵਾਉਣ ਭਗਵੰਤ ਮਾਨ- ਪਰਤਾਪ ਸਿੰਘ ਬਾਜਵਾ

ਹੁਣ ਤੂੰ ਕਿਧਰ ਗਿਆ, ਜੇਠ ਬੋਲੀਆਂ ਮਾਰੇ।

ਭਾਜਪਾ ਨੇ ‘ਆਪ’ ਨੂੰ ਤੋੜਨ ਲਈ ਮੈਨੂੰ ਮੁੱਖ ਮੰਤਰੀ ਦੇ ਅਹੁਦੇ ਦੀ ਪੇਸ਼ਕਸ਼ ਕੀਤੀ- ਸਿਸੋਦੀਆ

ਬਾਹਲਿਆਂ ਭਰਾਵਾਂ ਵਾਲਿਆ, ਕਹਿਣਾ ਮੰਨ ਲੈ ਤੇ ਹੋ ਜਾ ਵੱਖਰਾ।

22.08.2022

10 ਬੱਚੇ ਪੈਦਾ ਕਰੋ, ਸਰਕਾਰ ਦੇਵੇਗੀ ਦਸ ਲੱਖ ਰੁਪਏ- ਇਕ ਖ਼ਬਰ

ਗਲਤਫ਼ਹਿਮੀ ‘ਚ ਨਾ ਰਹਿਓ ਭਾਈ, ਇਹ ਖ਼ਬਰ ਰੂਸ ਦੀ ਹੈ।

ਮਨੀਸ਼ ਤਿਵਾੜੀ ਨੇ ਨਿਤਿਨ ਗਡਕਰੀ ਨੂੰ ਹਾਈਵੇਜ਼ ਦੇ ਘੱਟ ਮੁਆਵਜ਼ੇ ਸਬੰਧੀ ਪੱਤਰ ਲਿਖਿਆ-ਇਕ ਖ਼ਬਰ

ਚਿੱਠੀਆਂ ਸਾਹਿਬਾਂ ਜੱਟੀ ਨੇ, ਲਿਖ ਮਿਰਜ਼ੇ ਵਲ ਪਾਈਆਂ।

ਵੱਡੀ ਗਿਣਤੀ ‘ਚ ਲੋਕ ਲੈਣ ਲੱਗੇ ਆਮ ਆਦਮੀ ਕਲਿਨਕਾਂ ਦਾ ਲਾਭ- ਇਕ ਖ਼ਬਰ

ਧਰਤੀ ਨੂੰ ਕਲੀ ਕਰਾ ਦੇ ਵੇ, ਨੱਚੂੰਗੀ ਸਾਰੀ ਰਾਤ।

ਦੁਨੀਆ ਦੇ ਸਭ ਤੋਂ ਵੱਧ ਪ੍ਰਦੂਸ਼ਿਤ ਸ਼ਹਿਰਾਂ ‘ਚੋਂ ਅਠਾਰਾਂ ਭਾਰਤ ਦੇ- ਇਕ ਖ਼ਬਰ

ਬਦਨਾਮ ਭੀ ਹੋਂਗੇ ਤੋ ਕਿਆ ਨਾਮ ਨਾ ਹੋਗਾ।

ਦੇਰ-ਸਵੇਰ ਸ਼੍ਰੋਮਣੀ ਅਕਾਲੀ ਦਲ ਦੀ ਲੀਡਰਸ਼ਿੱਪ ‘ਚ ਤਬਦੀਲੀ ਹੋਣੀ ਅਟੱਲ-ਇਕ ਖ਼ਬਰ

ਬੱਕਰੇ ਦੀ ਮਾਂ ਕਿੰਨਾ ਕੁ ਚਿਰ ਖੈਰ ਮਨਾਏਗੀ।

ਅਕਾਲੀ ਦਲ ਦੀ ਅਨੁਸ਼ਾਸਨੀ ਕਮੇਟੀ ਵਲੋਂ ਬਾਗ਼ੀਆਂ ਨੂੰ ਚਿਤਾਵਨੀ- ਇਕ ਖ਼ਬਰ

ਕਾਹਨੂੰ ਮਾਰਦੀ ਏਂ ਸਾਨੂੰ ਲਲਕਾਰੇ, ਨੀਂ ਔਖੀ ਹੋ ਜੂ ਕੈਦ ਕੱਟਣੀ।

ਨਰਿੰਦਰ ਮੋਦੀ ਨੇ ਅਜੇ ਤੱਕ ਅਜੈ ਮਿਸ਼ਰਾ ਨੂੰ ਮੰਤਰੀ ਮੰਡਲ ‘ਚੋਂ ਕਿਉਂ ਨਹੀਂ ਕੱਢਿਆ?- ਆਪ ਬੁਲਾਰਾ ਕੰਗ

ਜ਼ੁਲਫ਼ਾਂ ਦੀ ਛਾਂ ਕਰ ਕੇ, ਚੂਰੀਆਂ ਖਵਾਵੇ ਸੋਹਣੇ ਯਾਰ ਨੂੰ।

ਗੁਜਰਾਤ ‘ਚ ਡਰੱਗ ਫੈਕਟਰੀ ਦਾ ਪਰਦਾਫਾਸ਼, 1000 ਕਰੋੜ ਦਾ ਨਸ਼ੀਲਾ ਪਦਾਰਥ ਜ਼ਬਤ- ਇਕ ਖ਼ਬਰ

ਗੁਜਰਾਤ ਮਾਡਲ।

ਕੇਂਦਰ ਨੇ ਗੌਤਮ ਅਡਾਨੀ ਨੂੰ ਜ਼ੈੱਡ ਪਲੱਸ ਸਕਿਉਰਿਟੀ ਦਿਤੀ- ਇਕ ਖ਼ਬਰ

ਮਿੱਤਰਾਂ ਦੇ ਤਿੱਤਰਾਂ ਨੂੰ, ਨੀ ਮੈਂ ਤਲ਼ੀਆਂ ‘ਤੇ ਚੋਗ ਚੁਗਾਵਾਂ।

ਜਥੇਦਾਰ ਜੀ! ਬਾਦਲ ਪਰਵਾਰ ਦੀ ਖ਼ਾਤਰਦਾਰੀ ਛੱਡ ਕੇ ਪੰਥਕ ਜ਼ਿੰਮੇਵਾਰੀਆਂ ਵਲ ਧਿਆਨ ਦਿਉ-ਦਾਦੂਵਾਲ

ਹੱਥ ਪੈਰ ਰੱਬ ਨੇ ਦਿਤੇ, ਸੇਵਾ ਕਰ ਲੈ ਨਿਮਾਣੀਏਂ ਜਿੰਦੇ ।

ਸਿਆਸੀ ਪਾਰਟੀਆਂ ਨੂੰ ਚੋਣਾਂ ਸਮੇਂ ਵਾਅਦੇ ਕਰਨ ਤੋਂ ਰੋਕਿਆ ਨਹੀਂ ਜਾ ਸਕਦਾ- ਸੁਪਰੀਮ ਕੋਰਟ

ਨੀ ਮੈਂ ਕਿਉਂ ਕਰ ਜਾਵਾਂ ਕਾਅਬੇ ਨੂੰ, ਮੇਰਾ ਰਾਂਝਣ ਮੇਰਾ ਮੱਕਾ।

ਕਿਸਾਨ ਆਗੂਆਂ ਦੇ ਜਥੇ ਦੀ ਲਖੀਮਪੁਰ ਖੀਰੀ ਜਾਣ ਲਈ ਤਿਆਰੀ- ਇਕ ਖ਼ਬਰ

ਪਰਨਾ ਕਛਹਿਰਾ ਚੁੱਕ ਵੇ ਨਿਰੰਜਣਾ, ਲਾ ਡਗਾ ਨਗਾਰੇ, ਢੁੱਕ ਵੇ ਨਿਰੰਜਣਾ।

ਖੁਰਾਕ ਘੁਟਾਲੇ ਸਬੰਧੀ ਦਰਜ ਮਾਮਲੇ ਨੇ ਕਾਂਗਰਸੀਆਂ ਦੀ ਨੀਂਦ ਉਡਾਈ- ਇਕ ਖ਼ਬਰ

ਨਰਮ ਸਰੀਰਾਂ ਨੂੰ, ਪੈ ਗਏ ਮਾਮਲੇ ਭਾਰੀ।

ਬਿਹਾਰ ਦੀ ਨਵੀਂ ਸਰਕਾਰ ਵਿਚ 72 ਫ਼ੀ ਸਦੀ ਮੰਤਰੀਆਂ ਖਿਲਾਫ਼ ਅਪਰਾਧਿਕ ਕੇਸ ਦਰਜ-ਇਕ ਖ਼ਬਰ

ਸਾਬਣ ਥੋੜ੍ਹਾ ਮੈਲ਼ ਬਥੇਰੀ, ਖੂਹ ‘ਤੇ ਬੈਠਾ ਧੋਵੇ।

ਭਾਜਪਾ ਨੂੰ ਸਹੀ ਸਮਾਂ ਆਉਣ ‘ਤੇ ਜਵਾਬ ਦੇਵਾਂਗਾ- ਨਿਤੀਸ਼ ਕੁਮਾਰ

ਅੱਗੇ ਬੀਬੀ ਟੱਪਣੀ, ਪਿੱਛੇ ਢੋਲਾਂ ਦੀ ਘੜਮੱਸ।

ਕੈਨੇਡਾ ‘ਚ ਪੰਜਾਬੀ ਬੋਲਣ ਵਾਲਿਆਂ ਦੀ ਗਿਣਤੀ ਚੌਥੇ ਨੰਬਰ ‘ਤੇ ਦਰਜ- ਇਕ ਖ਼ਬਰ

ਮਾਂ-ਬੋਲੀ ਪੰਜਾਬੀ ਸਾਡੀ, ਅਸੀਂ ਜਿਉਂਦੇ ਇਸ ਦੀ ਸ਼ਾਨ ‘ਤੇ।

15 ਅਗਸਤ 2022

ਪਾਰਟੀ ਦੀ ਮਜ਼ਬੂਤੀ ਲਈ ਹਰੇਕ ਨੂੰ ਸੁਝਾਅ ਦੇਣ ਦਾ ਹੱਕ- ਚੰਦੂਮਾਜਰਾ

ਚੰਦੂਮਾਜਰਾ ਸਾਬ੍ਹ ਤੁਹਾਨੂੰ ਨਹੀਂ ਸੁਣਿਆ ਕਿ ਸਭ ਹੱਕ ਪ੍ਰਧਾਨ ਦੇ ਰਾਖਵੇਂ ਹਨ।

ਦਮਦਮੀ ਟਕਸਾਲ ਦਾ ਸਿੱਖੀ ਪ੍ਰਚਾਰ ਤੇ ਪ੍ਰਸਾਰ ‘ਚ ਬੇਮਿਸਾਲ ਯੋਗਦਾਨ- ਜਥੇਦਾਰ

ਜਥੇਦਾਰ ਜੀ, ਫੇਰ ਸਾਰਾ ਮਾਝਾ ਈਸਾਈ ਕਿਉਂ ਬਣਦਾ ਜਾ ਰਿਹੈ?

ਪੁਲਿਸ ਦਾ ਗੈਂਗਸਟਰਾਂ ਨਾਲ ਵੀ.ਆਈ.ਪੀ. ਵਿਹਾਰ ਠੀਕ ਨਹੀਂ- ਬਲਕੌਰ ਸਿੰਘ

ਕੀ ਲਗਦੇ ਸੰਤੀਏ ਤੇਰੇ, ਜਿਹਨਾਂ ਨੂੰ ਰਾਤੀਂ ਖੰਡ ਪਾਈ ਸੀ।

ਭਾਜਪਾ ‘ਚ ਕੋਈ ਸੁਣਵਾਈ ਨਾ ਹੋਣ ‘ਤੇ ਸੁਨੀਲ ਜਾਖੜ ਔਖਾ-ਇਕ ਖ਼ਬਰ

ਵਕਤੋਂ ਮੈਂ ਖੁੰਝ ਗਈ, ਘੜਾ ਦੇਖ ਨਾ ਲਿਆ ਟੁਣਕਾ ਕੇ।

ਸੁਖਬੀਰ ਬਾਦਲ ਸੱਤਾ ਦੀ ਥਾਂ ਧਰਮ ਪ੍ਰਚਾਰ ਵਲ ਧਿਆਨ ਦੇਣ- ਜਥੇਦਾਰ

ਬਿਲਕੁਲ ਜਥੇਦਾਰ ਜੀ, ਸਿੱਖ ਸਿਧਾਂਤ ਦਾ ਏਨਾ ਵੱਡਾ ਵਿਦਵਾਨ ਫੇਰ ਕਿੱਥੋਂ ਮਿਲੇਗਾ !
 

ਅਕਾਲੀ ਦਲ ਜਗਮੀਤ ਬਰਾੜ ਖ਼ਿਲਾਫ਼ ਸਖਤ ਕਾਰਵਾਈ ਦੇ ਰੌਂਅ ਵਿਚ- ਇਕ ਖ਼ਬਰ

ਸਲਵਾਨ ਸਿਪਾਹੀਆਂ ਨੂੰ ਆਖਦਾ, ਪੂਰਨ ਜਲਦੀ ਕਰੋ ਹਲਾਲ।

ਨਰਿੰਦਰ ਮੋਦੀ ਵਲੋਂ ਬੰਗਾਲ ਦੇ ਸਾਬਕਾ ਰਾਜਪਾਲ ਧਨਖੜ ਨਾਲ਼ ਮੁਲਾਕਾਤ- ਇਕ ਖ਼ਬਰ

ਖੁਬ ਗੁਜ਼ਰੇਗੀ, ਜਬ ਮਿਲ ਬੈਠੇਂਗੇ ਦੀਵਾਨੇ ਦੋ।

ਕਿਸਾਨਾਂ ਨੇ ਬਿਜਲੀ ਸੋਧ ਬਿੱਲ ਦੀਆਂ ਕਾਪੀਆਂ ਸਾੜ ਕੇ ਰੋਸ ਪ੍ਰਗਟਾਇਆ- ਇਕ ਖ਼ਬਰ

ਜੱਗ ਭਾਵੇਂ ਜੋ ਵੀ ਕਹੇ, ਸੱਸ ਪਿੱਟਣੀ ਪੰਜੇਬਾਂ ਪਾ ਕੇ।

ਕੇਂਦਰ ਨੂੰ ਰਾਜਾਂ ‘ਤੇ ਨੀਤੀਆਂ ਨਹੀਂ ਠੋਸਣੀਆਂ ਚਾਹੀਦੀਆਂ-ਮਮਤਾ ਬੈਨਰਜੀ

ਛੜੇ ਜੇਠ ਦੀ ਮੈਂ ਅੱਖ ਵਿਚ ਰੜਕਾਂ, ਕੰਧ ਉੱਤੋਂ ਰਹੇ ਝਾਕਦਾ।

ਮਜਬੂਤ ਵਿਰੋਧੀ ਧਿਰ ਦੀ ਏਕਤਾ ਲਈ ਭੂਮਿਕਾ ਨਿਭਾਉਣ ਲਈ ਤਿਆਰ ਹਾਂ- ਨਿਤੀਸ਼

ਕੰਢੇ ਕੰਢੇ ਹੀਰ ਭਾਲ਼ਦਾ, ਰਾਂਝਾ ਪੱਜ ਮੱਝੀਆਂ ਦਾ ਲਾਵੇ।

ਕੇਜਰੀਵਾਲ ਨੇ ਗੁਜਰਾਤ ’ਚ ਭਾਜਪਾ ‘ਤੇ ਸਾਧੇ ਨਿਸ਼ਾਨੇ, ਲੋਕਾਂ ਤੋਂ ਸਹਿਯੋਗ ਮੰਗਿਆ- ਇਕ ਖ਼ਬਰ

ਕਾਹਨੂੰ ਡਾਹ ਲਿਆ ਗਲ਼ੀ ਦੇ ਵਿਚ ਚਰਖ਼ਾ, ਬਹੁਤਿਆਂ ਦੇ ਖ਼ੂਨ ਹੋਣਗੇ।

ਜਾਖੜ ਨੇ ਹਲਕੇ ‘ਚ ਕਿਸੇ ਆਗੂ ਨੂੰ ਉੱਠਣ ਨਹੀਂ ਦਿਤਾ- ਵੜਿੰਗ

ਆਉਂਦੀ ਜਾਂਦੀ ਨੂੰ ਘੜਾ ਚੁਕਾਉਂਦਾ, ਮਗਰੋਂ ਮਾਰਦਾ ਗੋਡਾ।

ਸਿੱਖੀ ਦੇ ਭੇਸ ‘ਚ ਬੁੱਕਲ ਦੇ ਸੱਪ ਸਿੱਖ ਸੰਸਥਾਵਾਂ ਨੂੰ ਕਮਜ਼ੋਰ ਕਰ ਰਹੇ ਹਨ- ਜਥੇਦਾਰ

ਜਥੇਦਾਰ ਜੀ, ਬੁੱਕਲ਼ ਦੇ ਸੱਪਾਂ ਨੂੰ ਦੁੱਧ ਕੌਣ ਪਿਆਉਂਦੈ !

ਬਲਬੀਰ ਸਿੱਧੂ ਦੀ ਕਾਂਗਰਸ ਵਿਚ ਵਾਪਸੀ ਅਸੰਭਵ- ਵੜਿੰਗ

ਡੇਕ ਦਾ ਗੁਮਾਨ ਕਰਦੀ, ਸਾਨੂੰ ਤੋਤਿਆਂ ਨੂੰ ਬਾਗ਼ ਬਥੇਰੇ।

ਸ਼ਰੀਫ਼ ਵਲੋਂ ਪਾਕਿਸਤਾਨ ਨੂੰ ਆਰਥਿਕ ਸ਼ਕਤੀ ‘ਚ ਬਦਲਣ ਦਾ ਅਹਿਦ- ਇਕ ਖ਼ਬਰ

ਤੈਂ ਕੀ ਸ਼ੇਰ ਮਾਰਨਾ, ਤੇਰੇ ਪਿਉ ਨੇ ਬਿੱਲੀ ਨਾ ਮਾਰੀ।

ਕਾਲ਼ਾ ਜਾਦੂ ਵੀ ਕਾਂਗਰਸ ਦੇ ਕੰਮ ਨਹੀਂ ਆਉਣਾ- ਮੋਦੀ

ਬਾਰਾਂ ਬਰਸ ਬੰਦ ਰੱਖਣਾ ਵਿਚ ਭੋਰੇ, ਵੇਖ ਪੰਡਤਾਂ ਬੋਲ ਸੁਣਾਇਆ ਈ।

08 ਅਗਸਤ 2022

ਸੁਖਬੀਰ ਬਾਦਲ ਨੂੰ ਪ੍ਰਧਾਨਗੀ ਤੋਂ ਲਾਹੁਣ ਲਈ ਇਕੱਠੇ ਹੋਏ ਟਕਸਾਲੀ ਅਕਾਲੀ- ਇਕ ਖ਼ਬਰ

ਤੇਰੀ ਤੋੜ ਕੇ ਛੱਡਣਗੇ ਗਾਨੀ, ਨੀਂ ਸੋਨੇ ਦੇ ਤਵੀਤ ਵਾਲ਼ੀਏ।

ਤੇਜਸਵੀ ਨਾਲ਼ ਨਿਤੀਸ਼ ਕੁਮਾਰ ਦੀਆਂ ਨਜ਼ਦੀਕੀਆਂ ਤੋਂ ਭਾਜਪਾ ਖ਼ਫ਼ਾ- ਇਕ ਖ਼ਬਰ

ਵੇ ਘਰ ਤੇਲਣ ਦੇ, ਤੇਰਾ ਚਾਦਰਾ ਖੜਕੇ।

ਪੇਲੋਸੀ ਦਾ ਤਾਇਵਾਨ ਦੌਰਾ ਖੇਤਰੀ ਸ਼ਾਂਤੀ ਲਈ ਖ਼ਤਰਨਾਕ- ਪਾਕਿਸਤਾਨ

ਅੱਖ ਮੇਰੇ ਯਾਰ ਦੀ ਦੁਖੇ, ਲਾਲੀ ਮੇਰੀਆਂ ਅੱਖਾਂ ਵਿਚ ਰੜਕੇ।

ਸ਼੍ਰੋਮਣੀ ਕਮੇਟੀ ਦੀਆਂ ਸਰਾਵਾਂ ‘ਤੇ ਜੀ.ਐਸ.ਟੀ. ਲਗਾਉਣਾ ਪਾਪ ਕਮਾਉਣ ਬਰਾਬਰ- ਸੁਖਬੀਰ ਬਾਦਲ

ਸ਼੍ਰੋਮਣੀ ਕਮੇਟੀ ਚੂੰਡ ਚੂੰਡ ਖਾਣੀ ਕਿਹੜੇ ਪੁੰਨ ‘ਚ ਆਉਂਦੀ ਐ ਬਈ?

ਭਗਵੰਤ ਮਾਨ ਵਲੋਂ ਵਿਧਾਇਕਾਂ ਨੂੰ ਲੋਕਾਂ ਨਾਲ ਸੰਜਮ ਰੱਖ ਕੇ ਪੇਸ਼ ਆਉਣ ਦੀ ਨਸੀਹਤ- ਇਕ ਖ਼ਬਰ

ਢੋਲਣੇ ਨੇ ਵਰਜ ਦਿਤੀ, ਸੰਗ ਛੁੱਟਿਆ ਸਹੇਲੀਏ ਤੇਰਾ।

ਪੰਜਾਬ ‘ਚ ਸਿੱਖ ਧਰਮ ਦਾ ਪ੍ਰਚਾਰ ਕਰਨ ਲਈ ਦਿੱਲੀ ਕਮੇਟੀ ਨੇ ਅੰਮ੍ਰਿਤਸਰ ਵਿਚ ਦਫ਼ਤਰ ਖੋਲ੍ਹਿਆ- ਇਕ ਖ਼ਬਰ

ਬਹਿ ਕੇ ਟੇਸ਼ਣ ‘ਤੇ, ਵੈਣ ਬੁੱਢੇ ਦੇ ਪਾਵਾਂ।

ਮੋਦੀ ਤੋਂ ਨਾ ਡਰਦਾ ਹਾਂ ਤੇ ਨਾ ਮੈਨੂੰ ਡਰਾਇਆ ਜਾ ਸਕਦੈ- ਰਾਹੁਲ ਗਾਂਧੀ

ਛੜਿਆ ਦੋਜ਼ਖੀਆ, ਚੁੱਲ੍ਹੇ ਅੱਗ ਨਾ ਘੜੇ ਵਿਚ ਪਾਣੀ।

ਉਪਾਸਨਾ ਸਿੰਘ ਮਿਸ ਯੂਨੀਵਰਸ ਹਰਨਾਜ਼ ਸੰਧੂ ਦੇ ਖ਼ਿਲਾਫ਼ ਪਹੁੰਚੀ ਅਦਾਲਤ- ਇਕ ਖ਼ਬਰ

ਭੂਆ ਭਤੀਜੀ ਲੜੀਆਂ, ਵਿਚ ਕਚਹਿਰੀ ਦੇ।

ਪੰਚਾਇਤੀ ਜ਼ਮੀਨ ਦੱਬਣ ਵਾਲ਼ੇ ਬਖ਼ਸ਼ੇ ਨਹੀਂ ਜਾਣਗੇ, ਭਾਵੇਂ ਕੋਈ ਵੀ ਹੋਵੇ- ਮੰਤਰੀ ਡਾ. ਨਿੱਜਰ

ਅੱਗੇ ਭੀੜੀਆਂ ਸੁਣੀਂਦੀਆਂ ਗਲ਼ੀਆਂ, ਜਿੱਥੋਂ ਦੀ ਜਮ ਲੈ ਜਾਣਗੇ।

ਪ੍ਰਧਾਨ ਮੰਤਰੀ ਦੇ ਭਰਾ ਪ੍ਰਹਿਲਾਦ ਮੋਦੀ ਨੇ ਜੰਤਰ ਮੰਤਰ ‘ਤੇ ਧਰਨਾ ਦਿਤਾ- ਇਕ ਖ਼ਬਰ

ਹੱਥ ਪਕੜ ਜੁੱਤੀ ਮੋਢੇ ਮਾਰ ਬੁੱਕਲ਼, ਰਾਂਝਾ ਹੋ ਤੁਰਿਆ ਵਾਰਸ ਸ਼ਾਹ ਜੇਹਾ।

ਚੀਨ ਦੀ ਚਿਤਾਵਨੀ ਦੇ ਬਾਵਜੂਦ ਨੈਂਸੀ ਪੇਲੋਸੀ ਪੁੱਜੀ ਤਾਇਵਾਨ- ਇਕ ਖ਼ਬਰ

ਚੰਨ ਬਣ ਗਿਆਂ ਠਾਣੇਦਾਰ, ਹੁਣ ਮੈਂ ਨਹੀਂ ਡਰਦੀ।

ਸਰਾਵਾਂ ‘ਤੇ ਜੀ.ਐਸ.ਟੀ. ਲਗਾ ਕੇ ਸਰਕਾਰ ਨੇ ਜਜ਼ੀਏ ਦੀ ਮੁੜ ਯਾਦ ਤਾਜ਼ਾ ਕਰਵਾ ਦਿਤੀ- ਜੀ.ਕੇ.

ਸਾਡੇ ਨਰਮ ਕਾਲਜੇ ਲੜ ਗਏ, ਲੱਡੂ ਖਾ ਲਏ ਤੇਰੇ ਤੇਲ ਦੇ।

ਭਗਵੰਤ ਮਾਨ ਲਈ ਚੁਣੌਤੀਆਂ ਤੇ ਵਿਵਾਦਾਂ ਦੀ ਭਰਮਾਰ- ਇਕ ਖ਼ਬਰ

ਕਾਬਲ ਦਿਆਂ ਜੰਮਿਆਂ ਨੂੰ, ਨਿੱਤ ਪੈਣ ਮੁਹਿੰਮਾਂ ਭਾਰੀਆਂ।

ਦੇਸ਼ ਦੀਆਂ ਜਾਂਚ ਏਜੰਸੀਆਂ ਲਈ ਵੀ ਕੋਈ ਲਛਮਣ ਰੇਖਾ ਹੋਣੀ ਚਾਹੀਦੀ ਹੈ- ਲਕਸ਼ਮੀ ਕਾਂਤਾ ਚਾਵਲਾ

ਵਿਹੜੇ ਵੜਦਾ ਖੜਕ ਨਹੀਂ ਕਰਦਾ, ਬਾਬੇ ਗਲ਼ ਟੱਲ ਪਾ ਦਿਉ।

ਬੱਚੇ ਨੇ ਬੈਂਕ ‘ਚੋਂ 35 ਲੱਖ ਰੁਪਇਆਂ ਨਾਲ਼ ਭਰਿਆ ਬੈਗ ਚੁੱਕਿਆ ਤੇ ਹੋ ਗਿਆ ਫੁਰਰ- ਇਕ ਖ਼ਬਰ

ਰੱਬ ਨੇ ਦਿਤੀਆਂ ਗਾਜਰਾਂ, ਵਿਚੇ ਰੰਬਾ ਰੱਖ।

ਮੇਰੀ ਜਾਣਕਾਰੀ ਬਿਨਾਂ ਮੇਰੇ ਫ਼ਲੈਟਾਂ ‘ਚ ਰੱਖਿਆ ਗਿਆ ਪੈਸਾ- ਅਰਪਿਤਾ ਮੁਖਰਜੀ

ਚੋਟਾਂ ਇਸ਼ਕ ਦੀਆਂ, ਨਰਮ ਕਾਲ਼ਜੇ ਸਹਿੰਦੀ।

02 ਅਗਸਤ 2022

ਰਾਮ ਨਾਥ ਕੋਵਿੰਦ ਨੇ ਸੰਵਿਧਾਨ ਦੇ ਨਾਮ ‘ਤੇ ਭਾਜਪਾ ਦੇ ਸਿਆਸੀ ਏਜੰਡੇ ਨੂੰ ਪੂਰਾ ਕੀਤਾ- ਮਹਿਬੂਬਾ ਮੁਫ਼ਤੀ

ਸ਼ਾਹ ਮੁਹੰਮਦਾ ਪੁੱਛਦੇ ਲੋਕ ਸਿੰਘ ਜੀ, ਤੁਸੀਂ ਚੰਗੀਆਂ ਪੂਰੀਆਂ ਪਾ ਆਏ।

ਐਮ.ਐਸ.ਪੀ ਲਈ ਕਮੇਟੀ ਨਹੀਂ, ਕਾਨੂੰਨੀ ਗਾਰੰਟੀ ਚਾਹੀਦੀ ਹੈ-ਡੱਲੇਵਾਲ

ਕਾਦਰਯਾਰ ਅਸਵਾਰ ਹੋ ਖ਼ਾਲਸਾ ਜੀ, ਮੱਥਾ ਨਾਲ਼ ਫਿਰੰਗੀ ਦੇ ਲਾਂਵਦੇ ਨੇ।

ਮੱਧ ਪ੍ਰਦੇਸ਼ ‘ਚ ਇਕ ਹੀ ਸਰਿੰਜ ਨਾਲ਼ 39 ਬੱਚਿਆਂ ਨੂੰ ਕੋਰੋਨਾ ਵੈਕਸੀਨ ਲਗਾ ਦਿਤੀ- ਇਕ ਖ਼ਬਰ

ਡਿਜੀਟਲ ਇੰਡੀਆ।

ਪਾਣੀਆਂ ਦੀ ਵੰਡ ਵੇਲੇ ਪੰਜਾਬ ਨਾਲ਼ ਧੱਕਾ ਕੀਤਾ ਗਿਆ- ਰਾਜੇਵਾਲ

ਮੇਰਾ ਤੱਤੜੀ ਦਾ ਗਲ਼ ਖਾਲੀ, ਆਪ ਤੇ ਜ਼ੰਜੀਰੀ ਰੱਖਦਾ।

ਦੁਨੀਆਂ ਵਿਚ ਅਰਥ ਵਿਵਸਥਾ ਖ਼ਰਾਬ ਪਰ ਭਾਰਤ ‘ਚ 80 ਕਰੋੜ ਲੋਕਾਂ ਨੂੰ ਮਿਲਦੈ ਮੁਫ਼ਤ ਅਨਾਜ- ਮੋਦੀ

ਮੋਦੀ ਸਾਹਿਬ, ਇਹ ਵੀ ਦੱਸੋ ਕਿ 80 ਕਰੋੜ ਲੋਕ ਗ਼ਰੀਬ ਕਿਉਂ ਹਨ?

 

ਅਰਪਿਤਾ ਮੁਖਰਜੀ ਦੀਆਂ ਚਾਰ ‘ਗ਼ਾਇਬ’ ਕਾਰਾਂ ਦੀ ਭਾਲ਼ ਕਰ ਰਹੀ ਹੈ ਈ.ਡੀ.-ਇਕ ਖ਼ਬਰ

ਵਾਸ਼ਿੰਗ ਮਸ਼ੀਨ ਇਕ ਵਾਰੀ ਫੇਰ ਖੋਲ੍ਹ ਕੇ ਚੈੱਕ ਕਰੋ ਬਈ, ਸ਼ਾਇਦ ਉੱਥੇ ਲੁਕੋਈਆਂ ਹੋਣ।

ਸੜਕ ‘ਤੇ ਪਏ ਬੈਗ ‘ਚੋਂ ਮਿਲੇ 45 ਲੱਖ ਰੁਪਏ ਪੁਲਿਸ ਕਾਂਸਟੇਬਲ ਨੇ ਥਾਣੇ ‘ਚ ਜਮ੍ਹਾਂ ਕਰਵਾਏ- ਇਕ ਖ਼ਬਰ

ਕੋਈ ਹਰਿਆ ਬੂਟ ਰਹਿਓ ਈ।

ਸਵਿਸ ਬੈਂਕਾਂ ‘ਚ ਜਮ੍ਹਾਂ ਭਾਰਤੀ ਨਾਗਰਿਕਾਂ, ਕੰਪਨੀਆਂ ਦੇ ਪੈਸੇ ਦਾ ਕੋਈ ਸਰਕਾਰੀ ਅੰਦਾਜ਼ਾ ਨਹੀਂ- ਸਰਕਾਰ

ਏਸੇ ਕਰ ਕੇ ਹੀ ਸਰਕਾਰ ਲੋਕਾਂ ਨੂੰ ਪੰਦਰਾਂ ਪੰਦਰਾਂ ਲੱਖ ਰੁਪਿਆ ਨਹੀਂ ਦੇ ਸਕੀ।

ਵੇਸਵਾਗਮਨੀ ਦੇ ਦੋਸ਼ਾਂ ‘ਚ ਘਿਰੇ ਭਾਜਪਾ ਆਗੂ ਦੇ ਗ਼ੈਰ-ਜ਼ਮਾਨਤੀ ਵਾਰੰਟ ਜਾਰੀ- ਇਕ ਖ਼ਬਰ

ਉੜਨ ਖਟੋਲੇ ਪੇ ਉੜ ਜਾਊਂਗਾ, ਪੁਲਿਸ ਕੇ ਹਾਥ ਨਾ ਆਊਂਗਾ। 

ਪੰਜਾਬ ਅਤੇ ਪੰਜਾਬੀਅਤ ਦੇ ਭਲੇ ਲਈ ਸਾਰੇ ਅਕਾਲੀ ਦਲ ਇਕ ਝੰਡੇ ਹੇਠ ਇਕੱਠੇ ਹੋਣ- ਜਸਟਿਸ ਨਿਰਮਲ ਸਿੰਘ

ਨਾ ਨੌਂ ਮਣ ਤੇਲ ਹੋਵੇ, ਨਾ ਰਾਧਾ ਨੱਚੇ।

ਅਨਮੋਲ ਰਤਨ ਸਿੱਧੂ ਨੂੰ ਮਨਾਉਣ ਦੀ ਕੋਸ਼ਿਸ਼ ਕੀਤੀ ਸੀ- ਭਗਵੰਤ ਮਾਨ

ਅੜੀ ਵੇ ਅੜੀ, ਨਾ ਕਰ ਬਹੁਤੀ ਤੂੰ ਅੜੀ, ਕਾਹਨੂੰ ਜ਼ਿਦ ਤੂੰ ਫੜੀ।

ਸਾਬਕਾ ਰਾਸ਼ਟਰਪਤੀ ਗੋਟਾਬਾਯਾ ਰਾਜਪਕਸੇ ਸ੍ਰੀਲੰਕਾ ਵਾਪਸ ਪਰਤਣਗੇ- ਇਕ ਖ਼ਬਰ

ਕਾਹਲੀ ਕਾਹਲੀ ‘ਚ ਕਈ ਬੰਡਲ ਜਹਾਜ਼ ‘ਚ ਰੱਖ ਨਹੀਂ ਸੀ ਹੋਏ ਬਈ।

ਮਿਨੀ ਪੀ,ਐਚ.ਸੀ. ਨੂੰ ਚਲਾ ਰਿਹਾ ਹੈ ਦਰਜਾ ਚਾਰ ਮੁਲਾਜ਼ਮ- ਇਕ ਖ਼ਬਰ

ਸ਼ੁਕਰ ਹੈ ਕਿ ਕੋਈ ਤਾਂ ਹੈ, ਏਥੇ ਤਾਂ ਬਿਨਾਂ ਮੁਲਾਜ਼ਮਾਂ ਤੋਂ ਵੀ ਚਲਦੇ ਐ।

ਕਦੀ ਕਦੀ ਸਿਆਸਤ ਛੱਡਣ ਨੂੰ ਦਿਲ ਕਰਦਾ ਹੈ- ਨਿਤਿਨ ਗਡਕਰੀ

ਮਾਏਂ ਮੇਰਾ ਚਿੱਤ ਕਰਦਾ, ਪਾ ਬਗਲੀ ਸਾਧ ਹੋ ਜਾਵਾਂ।

ਅਕਾਲੀ ਦਲ ਨੇ ਪਾਰਟੀ ਦੇ ਪੁਨਰਗਠਨ ਦੇ ਅਧਿਕਾਰ ਸੁਖਬੀਰ ਬਾਦਲ ਨੂੰ ਸੌਂਪੇ- ਇਕ ਖ਼ਬਰ

ਬੋਹਲ਼ ਦੀ ਰਾਖੀ ਬੱਕਰਾ।

ਪੰਜਾਬ ਦੀ ਵਿਤੀ ਹਾਲਤ ਵਿਚ ਸੁਧਾਰ ਕਰਾਂਗੇ-ਹਰਪਾਲ ਚੀਮਾ

ਤੈਨੂੰ ਲੈ ਦਊਂ ਸਲੀਪਰ ਕਾਲ਼ੇ, ਨੀਂ ਬਾਜਰੇ ਨੂੰ ਪੱਕ ਲੈਣ ਦੇ।

24 ਜੁਲਾਈ 2022

ਤੇਜ਼ੀ ਨਾਲ਼ ਉਭਰ ਰਹੀ ਭਾਰਤੀ ਅਰਥ ਵਿਵਸਥਾ ਭਾਜਪਾ ਨੇ ਕੀਤੀ ਬਰਬਾਦ- ਰਾਹੁਲ ਗਾਂਧੀ

ਵਾਰਸ ਸ਼ਾਹ ਜਾਂ ‘ਹੀਰ’ ਨੂੰ ਖ਼ਬਰ ਹੋਈ, ਤੇਰੀ ਸੇਜ ਦਾ ਜੱਟ ਨੇ ਨਾਸ ਕੀਤਾ।

ਹੰਸ ਰਾਜ ਹੰਸ ਵਲੋਂ ਦਲੇਰ ਮਹਿੰਦੀ ਨਾਲ਼ ਜੇਲ੍ਹ ਵਿਚ ਮੁਲਾਕਾਤ- ਇਕ ਖ਼ਬਰ

ਸਿੱਲ੍ਹੀ ਸਿੱਲ੍ਹੀ ਆਉਂਦੀ ਏ ਹਵਾ, ਕਿਤੇ ਕੋਈ ਰੋਂਦਾ ਹੋਵੇਗਾ।

ਆਟਾ, ਚੌਲ਼ਾਂ ਸਮੇਤ ਹੋਰ ਵਸਤਾਂ ਮਹਿੰਗੀਆਂ ਹੋਣ ਨਾਲ਼ ਲੋਕਾਂ ‘ਚ ਰੋਸ- ਇਕ ਖ਼ਬਰ

ਲੋਕ ਆਟੇ ਦੀ ਜਗ੍ਹਾ ਬਰੈੱਡ ਖ਼ਰੀਦ ਲੈਣ ਤੇ ਚੌਲਾਂ ਦੀ ਜਗ੍ਹਾ ਖੀਰ ਖਾਣ।

ਰਾਜਾ ਵੜਿੰਗ ਨੇ ਪ੍ਰਧਾਨ ਬਣਨ ਤੋਂ ਬਾਅਦ ਆਪਣੀ ਪਾਰਟੀ ਹੀ ਖ਼ਤਮ ਕਰ ਦਿਤੀ- ਲਾਲਜੀਤ ਸਿੰਘ ਭੁੱਲਰ

ਨਾ ਰਹੇ ਬਾਂਸ, ਨਾ ਵੱਜੇ ਬੰਸਰੀ।

ਕੇਜਰੀਵਾਲ ਦੇ ਸਿੰਘਾਪੁਰ ਦੌਰੇ ਦੀ ਫਾਈਲ ਰੱਦ, ਜਾਣ ਦੀ ਇਜਾਜ਼ਤ ਨਹੀਂ ਮਿਲੀ- ਇਕ ਖ਼ਬਰ

ਕੱਦ ਏਸ ਦਾ ਅਸਾਂ ਨਹੀਂ ਵਧਣ ਦੇਣਾ, ਛਾਂਗ ਦਿਆਂਗੇ ਏਸ ਨੂੰ ਗਿੱਟਿਆਂ ਤੋਂ।

ਅਗਨੀਪੱਥ ਨਾਲ਼ ਸਬੰਧਤ ਸਾਰੀਆਂ ਪਟੀਸ਼ਨਾਂ ਸੁਪਰੀਮ ਕੋਰਟ ਨੇ ਦਿੱਲੀ ਹਾਈ ਕੋਰਟ ਨੂੰ ਭੇਜੀਆਂ- ਇਕ ਖ਼ਬਰ

ਵਾਹ ਵਾਹ ਰੇ ਤੇਰੀ ਚਤੁਰਾਈ, ਤਬੇਲੇ ਦੀ ਬਲਾਅ ਵਛੇਰੇ ਗਲ਼ ਪਾਈ।

ਹਰਸਿਮਰਤ ਬਾਦਲ ਨੇ ਲੋਕ ਸਭਾ ‘ਚ ਐਮ.ਐਸ.ਪੀ. ਦਾ ਮੁੱਦਾ ਚੁੱਕਿਆ- ਇਕ ਖ਼ਬਰ

ਜਿਹਨਾਂ ਰਾਹਾਂ ਦੀ ਮੈਂ ਸਾਰ ਨਾ ਜਾਣਾ, ਉਹਨੀਂ ਰਾਹੀਂ ਵੇ ਮੈਨੂੰ ਤੁਰਨਾ ਪਿਆ।

ਮਨਪ੍ਰੀਤ ਸਿੰਘ ਇਆਲੀ ਵਲੋਂ ਬਾਦਲਾਂ ਵਿਰੁੱਧ ਬਗ਼ਾਵਤ ਸ਼ੁੱਭ ਸੰਕੇਤ- ਭਾਈ ਢਪਾਲੀ

ਰੇਲੇ ਚੜ੍ਹਦੇ ਨੂੰ, ਹੱਥ ਜੋੜ ਕੇ ਰੁਮਾਲ ਫੜਾਵਾਂ।

ਸੰਯੁਕਤ ਕਿਸਾਨ ਮੋਰਚੇ ਨੇ ਕੇਂਦਰ ਵਲੋਂ ਐਮ.ਐਸ.ਪੀ. ਬਾਰੇ ਬਣਾਈ ਕਮੇਟੀ ਰੱਦ ਕੀਤੀ- ਇਕ ਖ਼ਬਰ

ਮੇਰੇ ਨਰਮ ਕਾਲਜੇ ਲੜ ਗਏ, ਲੱਡੂ ਖਾ ਲਏ ਤੇਰੇ ਤੇਲ ਦੇ।

ਅਕਾਲੀ ਦਲ ਦੀ ਲੀਡਰਸ਼ਿੱਪ ਨੂੰ ਤਿਆਗ ਦੀ ਭਾਵਨਾ ਦਿਖਾਉਣ ਦੀ ਲੋੜ- ਭਾਈ ਮਨਜੀਤ ਸਿੰਘ

ਕਰ ਲੈ ਬੰਦਗੀ ਤੂੰ ਸੁੱਤਾ ਜਾਗ ਬੰਦਿਆ, ਹੱਥ ਭਲਕ ਨੂੰ ਆਵਣਾ ਅੱਜ ਨਹੀਂ।

ਅਫ਼ਸਰ ਆਪਣੀਆਂ ਪੁਰਾਣੀਆਂ ਆਦਤਾਂ ਛੱਡ ਦੇਣ- ਮੰਤਰੀ ਡਾ. ਨਿੱਜਰ

ਡਾਕਟਰ ਆਉਂਦਾ ਪਰੈਣੀ ਕੱਸੀ, ਰੱਬਾ ਹੁਣ ਕੀ ਕਰੀਏ।

ਸ਼੍ਰੋਮਣੀ ਕਮੇਟੀ ਦੀ ਦਹਾੜ ਦਿੱਲੀ ਨੂੰ ਕੰਬਣੀ ਛੇੜ ਦਿੰਦੀ ਸੀ, ਹੁਣ ਅਗਲੇ ਅੰਦਰ ਵੀ ਨਹੀਂ ਬੁਲਾਉਂਦੇ- ਜਥੇਦਾਰ

ਜਥੇਦਾਰ ਜੀ, ਮੁਜਰਿਮਾਂ ‘ਤੇ ਉਂਗਲ ਰੱਖਣ ਦੀ ਹੈ ਹਿੰਮਤ ਤੁਹਾਡੇ ਕੋਲ਼?

‘ਆਪ’ ਦੇ ਸੰਸਦ ਮੈਂਬਰਾਂ ਨੇ ਪੰਜਾਬ ਦੇ ਮੁੱਦਿਆਂ ‘ਤੇ ਨਾ ਬੋਲ ਕੇ ਪੰਜਾਬੀਆਂ ਨਾਲ਼ ਧੋਖਾ ਕੀਤਾ- ਪ੍ਰਤਾਪ ਬਾਜਵਾ

ਜੇ ਮਾਏਂ ਕੁਝ ਦਿਸਦਾ ਹੋਵੇ, ਥੋੜ੍ਹਾ ਕਰਾਂ ਅੰਦੇਸਾ। 

ਘੁੰਮ ਫਿਰ ਕੇ ਹੁਣ ਕਾਂਗਰਸੀ ਨਵਜੋਤ ਸਿੱਧੂ ਨੂੰ ਅੱਗੇ ਲਿਆਉਣ ਲਈ ਕਾਹਲੇ- ਇਕ ਖ਼ਬਰ

ਕੋਠੀ ‘ਚੋਂ ਲਿਆ ਦੇ ਘੁੰਗਰੂ, ਬੱਗੇ ਬਲਦ ਖਰਾਸੇ ਜਾਣਾ।

18 ਜੁਲਾਈ 2022

ਕੌਮ ‘ਚੋਂ ਰੂਹਾਨੀ ਤੇ ਸਿਆਸੀ ਤਾਕਤ ਮਨਫ਼ੀ ਹੋਣ ਕਾਰਨ ਸਿੱਖ ਨਿਰਾਸ਼- ਜਥੇਦਾਰ ਅਕਾਲ ਤਖ਼ਤ

ਵਾਰਸ ਸ਼ਾਹ ਜਿਉਂ ਦਲਾਂ ਪੰਜਾਬ ਲੁੱਟੀ, ਤਿਉਂ ਜੋਗੀ ਨੂੰ ਲੁੱਟਿਆਂ ਡਾਰੀਆਂ ਨੇ।

ਸਿਆਸੀ ਲਾਹੇ ਲਈ ਲੋਕਾਂ ਨੂੰ ਵੰਡਿਆ ਜਾ ਰਿਹੈ- ਅਮਰਤਿਆ ਸੇਨ

ਧੜਿਆਂ ‘ਚ ਪਿੰਡ ਵੰਡ ‘ਤਾ, ਕਾਹਦਾ ਪੈਰ ਤੂੰ ਜਵਾਨੀ ਵਿਚ ਪਾਇਆ।

ਚੰਡੀਗੜ੍ਹ ‘ਤੇ ਸਿਰਫ਼ ਪੰਜਾਬ ਦਾ ਹੱਕ, ਹਰਿਆਣਾ ਆਪਣਾ ਪ੍ਰਬੰਧ ਕਰੇ- ਮੁਨੀਸ਼ ਤਿਵਾੜੀ

ਚੁੱਕ ਚਰਖਾ ਪਰ੍ਹਾਂ ਕਰ ਪੀੜ੍ਹੀ, ਛੜਿਆਂ ਨੇ ਬੋਕ ਬੰਨ੍ਹਣਾਂ।

ਮੁੰਬਈ ਦੀ ਨਹਾਵਾ ਸ਼ੇਵਾ ਬੰਦਰਗਾਹ ਤੋਂ 73 ਕਿੱਲੋ ਹੈਰੋਇਨ ਪੁਲਿਸ ਨੇ ਫੜੀ- ਇਕ ਖ਼ਬਰ

ਜਿਹੜੀ ਕਈ 73 ਸੌ ਕਿੱਲੋ ਬਿਨ ਫੜਿਆਂ ਹੀ ਲੰਘ ਜਾਂਦੀ ਐ, ਉਸ ਦੀ ਵੀ ਗੱਲ ਕਰੋ।

ਪੰਜਾਬ ਦੀ ਕਿਸਾਨੀ ਲਈ ਵਿਤੀ ਪੈਕੇਜ ਐਲਾਨੇ ਕੇਂਦਰ ਸਰਕਾਰ- ਕੁਲਦੀਪ ਸਿੰਘ ਧਾਲੀਵਾਲ

ਉਹ ਫਿਰੇ ਨੱਥ ਘੜਾਉਣ ਨੂੰ, ਉਹ ਫਿਰੇ ਨੱਕ ਵਢਾਉਣ ਨੂੰ।

ਵਿਚੋਲੇ ਦਾ ਕੰਮ ਕਰਦਾ ਸੀ ਸੰਗਤ ਸਿੰਘ ਗਿਲਜੀਆਂ ਦਾ ਭਤੀਜਾ- ਇਕ ਖ਼ਬਰ

ਮੰਤਰੀਆਂ ਦੇ ਭਤੀਜੇ ਤੇ ਭਾਣਜੇ, ਆਨੰਦ ਸੱਤਾ ਦਾ ਰੱਜ ਰੱਜ ਮਾਣਦੇ।

ਹੁਣ ਦੋ ਸਾਬਕਾ ਮੁੱਖ ਮੰਤਰੀ ਕੈਪਟਨ ਅਤੇ ਚੰਨੀ ਭਗਵੰਤ ਮਾਨ ਦੇ ਨਿਸ਼ਾਨੇ ‘ਤੇ- ਇਕ ਖ਼ਬਰ

ਜਿੱਥੇ ਮਰਜ਼ੀ ਨਿਸ਼ਾਨੇ ਲਾ, ਹੁਣ ਤੇਰੇ ਦਿਨ ਬੱਲਿਆ।

2023 ਤੱਕ ਭਾਰਤ ਦੀ ਆਬਾਦੀ ਚੀਨ ਨੂੰ ਵੀ ਪਿਛਾਂਹ ਛੱਡ ਦੇਵੇਗੀ-ਇਕ ਰਿਪੋਰਟ

ਬੁਲੇਟ ਟਰੇਨ ਪੁੱਠੇ ਪਾਸੇ ਨੂੰ ਚਲ ਪਈ ਭਾਈ।

ਪਟਿਆਲਾ ਜਿਹਲ ‘ਚ ਬਣੇਗੀ ਨਵਜੋਤ ਸਿੱਧੂ ਤੇ ਦਲੇਰ ਮਹਿੰਦੀ ਦੀ ਜੋੜੀ- ਇਕ ਖ਼ਬਰ

ਖੂਬ ਗੁਜ਼ਰੇਗੀ ਜਬ ਮਿਲ ਬੈਠੇਂਗੇ ਦੀਵਾਨੇ ਦੋ।

ਸ਼੍ਰੋਮਣੀ ਅਕਾਲੀ ਦਲ ਨੂੰ ਵੰਸ਼ਵਾਦ ਤੋਂ ਛੁਟਕਾਰਾ ਦਿਵਾਉਣ ਲਈ ਪੰਥ, ਯੁੱਧ ਦੇ ਮੈਦਾਨ ‘ਚ ਕੁੱਦਣ ਲੱਗਾ- ਇਕ ਖ਼ਬਰ

ਪੱਤ ਝੜੇ ਪੁਰਾਣੇ ਮਾਹੀ ਵੇ, ਰੁੱਤ ਨਵਿਆਂ ਦੀ ਆਈ ਆ ਢੋਲਾ।

ਸਿੰਘਾਪੁਰ ਦੇ ਦੌਰੇ ਲਈ ਮੋਦੀ ਸਰਕਾਰ ਕੇਜਰੀਵਾਲ ਨੂੰ ਮੰਨਜ਼ੂਰੀ ਨਹੀਂ ਦੇ ਰਹੀ- ਇਕ ਖ਼ਬਰ

ਕੇਜਰੀਵਾਲ ਜੀ ਤੁਸੀਂ ਕਿਤੇ ਮੋਦੀ ਸਾਹਿਬ ਦਾ ਜਹਾਜ਼ ਤਾਂ ਨਹੀਂ ਨਾਲ਼ ਮੰਗ ਰਹੇ।

ਧਰਮ ਪ੍ਰਚਾਰ ਦੇ ਮੁੱਦੇ ‘ਤੇ ਸ਼੍ਰੋਮਣੀ ਕਮੇਟੀ ਅਤੇ ਦਿੱਲੀ ਕਮੇਟੀ ਆਹਮੋ-ਸਾਹਮਣੇ- ਇਕ ਖ਼ਬਰ

ਰੌਲ਼ਾ ਧਰਮ ਪ੍ਰਚਾਰ ਦਾ ਨਹੀਂ ਭਾਈ.....ਬਾਕੀ ਤੁਸੀਂ ਪਾਠਕੋ ਖ਼ੁਦ ਸਿਆਣੇ ਹੋ।

ਰਾਘਵ ਚੱਢਾ ਦੀ ਚੇਅਰਮੈਨੀ ਦੇ ਵਿਰੁੱਧ ਵਕੀਲ ਜਗਮੋਹਨ ਸਿੰਘ ਵਲੋਂ ਅਦਾਲਤ ‘ਚ ਪਟੀਸ਼ਨ- ਇਕ ਖ਼ਬਰ

ਕਾਲ਼ੀ ਤਿੱਤਰੀ ਕਮਾਦੋਂ ਨਿਕਲੀ, ਉਡਦੀ ਨੂੰ ਬਾਜ਼ ਪੈ ਗਿਆ।

ਸੁਖਦੇਵ ਸਿੰਘ ਢੀਂਡਸਾ ਵਲੋਂ ਜਥੇਦਾਰ ਹਰਪ੍ਰੀਤ ਸਿੰਘ ਨਾਲ ਮੁਲਾਕਾਤ- ਇਕ ਖ਼ਬਰ

ਇਹ ਸੌਣਾ ਤੇਰੇ ਦਰਕਾਰ ਨਹੀਂ, ਉੱਠ ਜਾਗ ਘੁਰਾੜੇ ਮਾਰ ਨਹੀਂ।

ਅਕਾਲੀ ਦਲ ਨੂੰ ਘੁਣ ਵਾਂਗ ਖਾ ਗਿਆ ਪਰਵਾਰਵਾਦ- ਕਰਨੈਲ ਸਿੰਘ ਪੰਜੌਲੀ

ਕੁੱਕੜ, ਕੁੱਤੀਆਂ, ਭੰਗ, ਅਫੀਮ ਲੁੱਟੀ, ਮੇਰੀ ਛਾਉਣੀ ਚਾ ਉਜਾੜੀਆਂ ਨੇ।

ਦੇਸ਼ ਵਿਚ ਅਜੀਬ ਤਰ੍ਹਾਂ ਦੇ ਡਰ ਅਤੇ ਭੈਅ ਦਾ ਮਾਹੌਲ ਬਣਾਇਆ ਜਾ ਰਿਹੈ- ਯਸ਼ਵੰਤ ਸਿਨਹਾ

ਸੁੱਤੀ ਪਈ ਨੂੰ ਹਿਚਕੀਆਂ ਆਈਆਂ, ਖ਼ੈਰ ਹੋਵੇ ਸੱਜਣਾਂ ਦੀ।

11 ਜੁਲਾਈ 2022

ਖ਼ਾਲਸਾ ਏਡ ਦੇ ਹੱਕ ‘ਚ ਡਟੇ ਕਿਸਾਨ ਆਗੂ ਗੁਰਨਾਮ ਸਿੰਘ ਚੜੂਨੀ- ਇਕ ਖ਼ਬਰ

ਤੇਗ਼ਾਂ ਮਾਰਦਾ ਦਲਾਂ ਨੂੰ ਜਾਵੇ ਚੀਰਦਾ, ਗੋਰਿਆਂ ਦੇ ਘਾਣ ਲੱਥ ਗਏ।

ਬ੍ਰਿਟੇਨ ਦੇ ਪ੍ਰਧਾਨ ਮੰਤਰੀ ਬੋਰਿਸ ਜਾਹਨਸਨ ਨੇ ਆਖਰ ਅਸਤੀਫ਼ਾ ਦੇ ਹੀ ਦਿਤਾ- ਇਕ ਖ਼ਬਰ

ਬੱਕਰੀ ਨੇ ਦੁੱਧ ਦਿਤਾ ਪਰ ਦਿਤਾ ਮੀਂਗਣਾਂ ਪਾ ਕੇ।

ਸੰਯੁਕਤ ਕਿਸਾਨ ਮੋਰਚਾ ਕਿਸਾਨੀ ਮੰਗਾਂ ਲਈ ਮੁੜ ਸਰਗਰਮ- ਇਕ ਖ਼ਬਰ

ਡੰਡੀ ਡੰਡੀ ਆਵੇ ਬੁੱਕਦਾ, ਮੇਰੇ ਵੀਰ ਦਾ ਬਾਗੜੀ ਬੋਤਾ।

ਬਾਦਲਕਿਆਂ ਨੇ ਕੀਤੀਆਂ ਧਰਮ ਯੁੱਧ ਮੋਰਚੇ ਨਾਲ਼ ਗ਼ਦਾਰੀਆਂ- ਖਾਲੜਾ ਮਿਸ਼ਨ

ਪਹਾੜਾ ਸਿੰਘ ਸੀ ਯਾਰ ਫਰੰਗੀਆਂ ਦਾ, ਸਿੰਘਾਂ ਨਾਲ਼ ਸੀ ਉਸ ਦੀ ਗ਼ੈਰ ਸਾਲੀ।

ਕੁਝ ਮਹੀਨੇ ਪਹਿਲਾਂ ਹੀ ਬਣੀ ਸੜਕ ਵਿਚ ਪੈ ਗਏ ਟੋਏ- ਇਕ ਖ਼ਬਰ

ਇੱਥੇ ਤਾਂ ਬਿਨਾਂ ਬਣਾਇਆਂ ਵੀ ਸੜਕਾਂ ਦੀ ਮੁਰੰਮਤ ਹੋ ਜਾਂਦੀ ਐ।

ਕੇਜਰੀਵਾਲ ਬੇਅਦਬੀ ਕਾਂਡ ਵਿਚ ਬਾਦਲਾਂ ਦੀ ਸ਼ਮੂਲੀਅਤ ਨੂੰ ਅਚਾਨਕ ਭੁੱਲ ਗਏ- ਪ੍ਰਤਾਪ ਸਿੰਘ ਬਾਜਵਾ

ਸਿਆਸਤ ਵਿਚ ਨਾ ਕੋਈ ਕਿਸੇ ਦਾ ਮਿੱਤਰ ਤੇ ਨਾ ਕੋਈ ਦੁਸ਼ਮਣ।

ਬੰਗਾਲ ਦੇ ਰਾਜਪਾਲ ਨੇ ਮੁੱਖ ਮੰਤਰੀ ਨੂੰ ਚਾਂਸਲਰ ਬਣਾਉਣ ਵਾਲਾ ਬਿੱਲ ਮੋੜਿਆ- ਇਕ ਖ਼ਬਰ

ਹਾਸ਼ਮ ਸਖ਼ਤ ਬਲੋਚ ਕਮੀਨੇ, ਬੇਇਨਸਾਫ ਬੇਦਰਦੀ।

ਮੋਦੀ ਤੇ ਸ਼ਾਹ ਨੇ ਮਹਾਰਾਸ਼ਟਰ ਦੇ ਵਿਕਾਸ ਲਈ ਪੂਰਨ ਸਮਰਥਨ ਦਾ ਭਰੋਸਾ ਦਿਤੈ- ਏਕਨਾਥ ਸ਼ਿੰਦੇ

ਜੰਞ ਜੋੜ ਕੇ ਰਾਂਝੇ ਨੇ ਤਿਆਰ ਕੀਤੀ, ਟੌਂਕ ਬੱਧੇ ਮਗਰ ਨਾਈਆਂ ਦੇ।

ਚੀਨ ਨੇ ਕਿਹਾ, ਅਸੀਂ ਚੰਦਰਮਾ ‘ਤੇ ਕਬਜ਼ਾ ਨਹੀਂ ਕਰ ਰਹੇ, ਅਮਰੀਕਾ ਝੂਠ ਨਾ ਫ਼ੈਲਾਏ- ਇਕ ਖ਼ਬਰ

ਕਾਲ਼ੇ ਦਾ ਇਕ ਛੱਪੜ ਸੁਣੀਂਦਾ, ਪਾਣੀ ਉਹਦਾ ਖਾਰਾ।

ਘੱਟ ਗਿਣਤੀਆਂ ਦੇ ਕਮਜ਼ੋਰ ਤੇ ਵਾਂਝੇ ਵਰਗਾਂ ਤਾਈਂ ਵੀ ਭਾਜਪਾ ਵਰਕਰ ਪਹੁੰਚਣ- ਮੋਦੀ

ਤਾਂ ਕਿ ‘ਸੇਵਾ’ ਤੋਂ ਕੋਈ ਵਾਂਝਾ ਨਾ ਰਹਿ ਜਾਵੇ।

ਟਵਿੱਟਰ ਵਲੋਂ ਸਰਕਾਰ ਦੇ ਹੁਕਮਾਂ ਨੂੰ ਹਾਈ ਕੋਰਟ ਵਿਚ ਚੁਨੌਤੀ –ਇਕ ਖ਼ਬਰ

ਵਿਚ ਕਚਹਿਰੀ ਦੇ, ਭੂਆ ਭਤੀਜੀ ਲੜੀਆਂ।

ਲਾਲ ਕਿਲ੍ਹੇ ‘ਤੇ ਝੰਡਾ ਲਹਿਰਾਉਣ ਦਾ ਹੱਕ ਸਿੱਖਾਂ ਦਾ ਵੀ ਹੈ- ਗਵਰਨਰ ਮਲਿਕ

ਵਾਰਸ ਸ਼ਾਹ ਮੀਆਂ ਇਨ੍ਹਾਂ ਆਸ਼ਕਾਂ ਨੂੰ, ਫਿਕਰ ਜ਼ਰਾ ਨਾ ਜਿੰਦ ਗੁਆਉਣੇ ਦਾ।

ਬਹਿਬਲ ਕਲਾਂ ਗੋਲ਼ੀ ਕਾਂਡ- ਪੁਲਿਸ ਅਧਿਕਾਰੀਆਂ ਨੂੰ ਹਾਈ ਕੋਰਟ ਤੋਂ ਨਾ ਮਿਲੀ ਰਾਹਤ- ਇਕ ਖ਼ਬਰ

ਨਾਜ਼ਕ ਬਦਨ ਫਰਸ਼ ਜਿਨ੍ਹਾਂ ਦੇ, ਬੰਦੀਖਾਨੇ ਲੇਟੇ।

ਪੰਜਾਬ ਸਰਕਾਰ ਦੇ ਬਰਾਬਰ ਚਲ ਰਹੀ ਹੈ ਗੈਂਗਸਟਰਾਂ ਦੀ ਸਰਕਾਰ- ਬਲਕੌਰ ਸਿੰਘ

ਦਿਨ ਬਖ਼ਤ ਅੰਧੇਰ ਸਿਆਹ ਰੱਖਿਆ, ਰਾਤ ਚਾਨਣੀ ਵੀ ਸਿਆਹ ਰਾਤ ਗੁਜ਼ਰੀ।

ਆਜ਼ਾਦ ਤਾਮਿਲਨਾਡੂ ਮੰਗਣ ਲਈ ਸਾਨੂੰ ਮਜਬੂਰ ਨਾ ਕਰੋ- ਏ.ਰਾਜਾ

ਘਰ ਦੇ ਟੱਬਰਾਂ ਬਿਨਾਂ, ਕਾਹਦੀਆਂ ਭਰਾਵੋ ਜੂਨਾਂ।

ਭ੍ਰਿਸ਼ਟਾਚਾਰ ਮਾਮਲਾ: ਧਰਮਸੋਤ ਨਾਲ ਕਿਸੇ ਆਗੂ ਨੇ ਨਹੀਂ ਕੀਤੀ ਮੁਲਾਕਾਤ- ਇਕ ਖ਼਼ਬਰ

ਇਹਨਾਂ ਸੁਹਣਿਆਂ ਮੂੰਹਾਂ ‘ਤੇ ਖ਼ਾਕ ਪੈਣੀ, ਕੁੰਡੇ ਲੱਗਣੇ ਅੰਤ ਹਵੇਲੀਆਂ ਨੂੰ।

ਊਧਵ ਠਾਕਰੇ ਵਲੋਂ ਮੁੱਖ ਮੰਤਰੀ ਦੇ ਅਹੁਦੇ ਤੋਂ ਅਸਤੀਫ਼ਾ- ਇਕ ਖ਼ਬਰ

ਪਾਣੀ ਡੋਲ੍ਹ ਗਈ ਝਾਂਜਰਾਂ ਵਾਲ਼ੀ, ਕੈਂਠੇ ਵਾਲ਼ਾ ਤਿਲਕ ਪਿਆ।

ਸੰਸਦ ‘ਚ ਪੰਜਾਬੀਆਂ ਦੀ ਆਵਾਜ਼ ਬਣ ਕੇ ਗੂੰਜਾਂਗਾ- ਸਿਮਰਨਜੀਤ ਸਿੰਘ ਮਾਨ

ਸਿੰਘ ਸੂਰਮੇ ਸ਼ੇਰ ਦਲੇਰ ਬਾਂਕੇ, ਕੱਸਣ ਘੋੜੀਆਂ ਜ਼ੀਨਾਂ ਸਵਾਰੀਆਂ ਨੀਂ।

ਚੋਰਾਂ ਨੇ ਖੜ੍ਹੀ ਕਾਰ ਦੇ ਟਾਇਰ ਚੋਰੀ ਕਰ ਲਏ-ਇਕ ਖ਼ਬਰ

ਭੱਜੀ ਜਾਂਦੀ ਕਾਰ ਦੇ ਟਾਇਰ ਤਾਂ ਅੱਜ ਤੱਕ ਕਿਸੇ ਨੇ ਚੋਰੀ ਕੀਤੇ ਨਹੀਂ।

ਛੇਤੀ ਹੋ ਸਕਦੈ ਕੈਪਟਨ ਦੀ ਪਾਰਟੀ ਦਾ ਭਾਜਪਾ ਵਿਚ ਰਲੇਵਾਂ- ਇਕ ਖ਼ਬਰ

ਡੋਰ ਵੱਟ ਕੇ ਗਲ਼ੇ ਦੇ ਵਿਚ ਪਾਵਾਂ, ਮਿੱਤਰਾ ਤਵੀਤ ਬਣ ਜਾ।

ਰਿਸ਼ਵਤ ਦੇ ਮਾਮਲੇ ‘ਚ ਪੁਲਿਸ ਮੁਲਾਜ਼ਮ 24 ਸਾਲ ਬਾਅਦ ਅਦਾਲਤ ‘ਚੋਂ ਬਰੀ ਹੋਇਆ- ਇਕ ਖ਼ਬਰ

‘ਇਸ ਅਦਾਲਤ ‘ਚ ਬੰਦੇ ਬਿਰਖ ਹੋ ਗਏ’- ਬਕੌਲ ਸੁਰਜੀਤ ਪਾਤਰ

ਬੰਦੀ ਸਿੰਘਾਂ ਬਾਰੇ ਸਵਾਲ ਪੁੱਛੇ ਜਾਣ ‘ਤੇ ਸੁਖਬੀਰ ਬਾਦਲ ਖਿਸਕੇ- ਇਕ ਖ਼ਬਰ

ਜ਼ਖ਼ਮਾਂ ‘ਤੇ ਲੂਣ ਨਾ ਛਿੜਕੀਂ ਤੂੰ, ਮੇਰੀ ਛੇੜ ਕੇ ਦਰਦ ਕਹਾਣੀ ਨੂੰ।

27 ਜੂਨ 2022

ਹੌਲਦਾਰ 10 ਹਜ਼ਾਰ ਰੁਪਏ ਦੀ ਰਿਸ਼ਵਤ ਲੈਂਦਾ ਕਾਬੂ- ਇਕ ਖ਼ਬਰ

ਹਾਇ ਓ ਰੱਬਾ ਰਿਸ਼ਵਤ ਬਾਝ ਹਨ੍ਹੇਰਾ, ਨਹੀਂ ਲਗਦਾ ਦਿਲ ਮੇਰਾ।

‘ਆਪ’ ਲੋਕਾਂ ਦੀਆਂ ਉਮੀਦਾਂ ‘ਤੇ ਖਰੀ ਉੱਤਰੇਗੀ, ਥੋੜ੍ਹਾ ਸੰਜਮ ਰੱਖਣ ਦੀ ਲੋੜ ਹੈ- ਭਗਵੰਤ ਮਾਨ

ਤੈਨੂੰ ਲੈ ਦਊਂ ਸਲੀਪਰ ਕਾਲ਼ੇ, ਹੌਸਲਾ ਤੂੰ ਰੱਖ ਗੋਰੀਏ।

ਸੰਗਰੂਰ ਦੀ ਸੀਟ ਸਿਆਸੀ ਧਿਰਾਂ ਲਈ ਬਣੀ ਵਕਾਰ ਦਾ ਸਵਾਲ- ਇਕ ਖ਼ਬਰ

ਕੁੰਢੀਆਂ ਦੇ ਸਿੰਙ ਫ਼ਸ ਗਏ, ਕੋਈ ਨਿਤਰੂ ਵੜੇਵੇਂ ਖਾਣੀ।

ਫੌਜ ਵਾਪਸ ਨਹੀਂ ਲਵੇਗੀ ਅਗਨੀਪੱਥ ਯੋਜਨਾ- ਭਾਰਤ ਸਰਕਾਰ

ਵਾਰਸ ਸ਼ਾਹ ਨਾ ਮੁੜਾਂ ਰੰਝੇਟੜੇ ਤੋਂ , ਭਾਵੇਂ ਬਾਪ ਦੇ ਬਾਪ ਦਾ ਬਾਪ ਆਵੇ।

ਸੰਗਰੂਰ ਚੋਣ ਬੰਦੀ ਸਿੰਘਾਂ ਦੀ ਰਿਹਾਈ ਲਈ ਲੜੀ ਗਈ- ਹਰਸਿਮਰਤ ਬਾਦਲ

ਬੀਬੀ ਜੀ ਇਹ ਲੂਣ ਕਿੰਨਾ ਕੁ ਚਿਰ ਗੁੰਨ੍ਹੀ ਜਾਉਗੇ?

‘ਰਬੜ ਦੀ ਮੋਹਰ’ ਵਾਲਾ ਰਾਸ਼ਟਰਪਤੀ ਦੇਸ਼ ਲਈ ਕਿਸੇ ਕੰਮ ਦਾ ਨਹੀਂ- ਯਸ਼ਵੰਤ ਸਿਨਹਾ

ਤੂੰ ਕਾਹਦਾ ਪਟਵਾਰੀ, ਮੁੰਡਾ ਮੇਰਾ ਰੋਵੇ ਅੰਬ ਨੂੰ।

ਸ਼੍ਰੋਮਣੀ ਅਕਾਲੀ ਦਲ ਆਪਣੀਆਂ ਕਮੀਆਂ ਸੁਧਾਰ ਕੇ ਭਵਿੱਖ ‘ਚ ਮਜ਼ਬੂਤ ਹੋਵੇਗਾ- ਜਗਦੀਪ ਸਿੰਘ ਚੀਮਾ

ਯਾਨੀ ਕਿ ਹੁਣ ਗੁਲੂਕੋਜ਼ ਲੱਗਣ ਦੀ ਉਡੀਕ ਕਰ ਰਹੇ ਹੋ।

ਬੰਦੀ ਸਿੰਘਾਂ ਦੀ ਰਿਹਾਈ ਲਈ ਚੋਣ ਲੜ ਰਹੇ ਹਾਂ-ਸੁਖਬੀਰ ਬਾਦਲ

ਕੰਢੇ ਕੰਢੇ ਹੀਰ ਭਾਲ਼ਦਾ, ਰਾਂਝਾ ਪੱਜ ਮੱਝੀਆਂ ਦਾ ਲਾਵੇ।

ਸੰਗਰੂਰ ਚੋਣ ਦੀ ਹਾਰ ਸਾਡੇ ਅਵੇਸਲੇਪਨ ਅਤੇ ਵੱਧ ਭਰੋਸੇ ਦਾ ਨਤੀਜਾ- ਵਿਧਾਇਕ ਲਖਬੀਰ ਰਾਏ

ਵਕਤੋਂ ਮੈਂ ਖੁੰਝ ਗਈ, ਘੜਾ ਦੇਖ ਨਾ ਲਿਆ ਟੁਣਕਾ ਕੇ।

ਸੰਗਰੂਰ ਨੇ ਦੱਸ ਦਿਤਾ ਹੈ ਕਿ ਪੰਜਾਬ ਨੂੰ ਦਿੱਲੀ ਥੱਲੇ ਲੱਗਣਾ ਮੰਨਜ਼ੂਰ ਨਹੀਂ- ਬੀਬੀ ਕਿਰਨਜੋਤ ਕੌਰ

ਤੇਰੀ ਰੰਨ ਦਾ ਨਾ ਭਰਨਾ ਪਾਣੀ, ਤੇਰੀ ਨਾ ਕਨੌੜ ਝੱਲਣੀ।

ਰੂਸ ਨੇ ਚੀਨ ਨੂੰ ਸਸਤੇ ਦਰਾਂ ‘ਤੇ ਸ਼ੁਰੂ ਕੀਤੀ ਤੇਲ ਦੀ ਸਪਲਾਈ- ਇਕ ਖ਼ਬਰ

ਅਸਾਂ ਜੇਠ ਨੂੰ ਲੱਸੀ ਨਹੀਉਂ ਦੇਣੀ, ਦਿਉਰ ਭਾਵੇਂ ਦੁੱਧ ਪੀ ਲਵੇ।

ਭਾਜਪਾ ਦੀ ਸੇਵਾ ‘ਚ ਲੱਗੀਆਂ ਹੋਈਆਂ ਹਨ ਸੀ.ਬੀ.ਆਈ. ਅਤੇ ਈ.ਡੀ.- ਹਰੀਸ਼ ਰਾਵਤ

ਬਾਣੀਆਂ ਨੇ ਅੱਤ ਚੁੱਕ ਲਈ, ਸਾਰੇ ਜੱਟ ਕਰਜ਼ਾਈ ਕੀਤੇ।

‘ਅਗਨੀਪੱਥ’ ਯੋਜਨਾ ਮੋਦੀ ਦਾ ਇਕ ਹੋਰ ਜੁਮਲਾ ਤੇ ਛਲਾਵਾ- ਬੀਬੀ ਰਾਜੂ

ਤੈਥੋਂ ਸਾਹਿਬ ਲੇਖਾ ਮੰਗਸੀ, ਬਾਹੂ ਰੱਤੀ ਘੱਟ ਨਾ ਮਾਸਾ ਹੂ।

ਸ਼੍ਰੋਮਣੀ ਕਮੇਟੀ ਦੀਆਂ ਚੋਣਾਂ ਦਾ ਅਮਲ ਫੇਰ ਠੰਢੇ ਬਸਤੇ ਵਿਚ- ਇਕ ਖ਼ਬਰ

ਛੜਿਆਂ ਦੇ ਗਈ ਅੱਗ ਨੂੰ, ਉਹਨੀਂ ਚੱਪਣੀ ਭੁਆਂ ਕੇ ਮਾਰੀ।

ਬੇਅਦਬੀ ਕਾਂਡ: ਸਬੂਤ ਹੋਣ ਦੇ ਬਾਵਜੂਦ ਬਾਦਲਾਂ ਨੂੰ ਬਚਾਇਆ ਗਿਆ- ਕੁੰਵਰ ਵਿਜੈ ਪ੍ਰਤਾਪ ਸਿੰਘ

ਲਾਲ ਸਿੰਘ ਤੇਜ ਸਿੰਘ ਜੀ, ਕਰ ਗਏ ਨੇ ਗ਼ਦਾਰੀ ਭਾਰੀ।

                                  ========